Salataa Kino Aya Dunia

Pasal 1

Bau-baunyo nu sasalataa ma’isa tinimbali na ata’ langit tiba aya tano’
1 Monsisik bau-baunyo nu aya dunia. Maka’ salataa tongko’ binau nu Anu Nonsihang na langit ahi’ ka’ tano’. 2 Maka’ aya tano’ ma’isa hi’ apa-paa koanu monjoongi. Maka’ tempo’nyo atu na dai’ ahi’ mogalo-galo’ na ue tiba aya tano’, ka’ pikat ahi’ tongko’. Panyo Kinyonyoa nu Tumpu na lewa’ ahi’ mongkambangi ata’ i buan nu ue.
Bau-baunyo nu salataa sinansina
3 Tinoka sumo atu binasisiko ahi’ na Anu Nonsihang konyo, “Paliana!” Salataa sinumo atu balomo hi’ naliana. 4 Manau’ nalianamo, na tinoa nu Anu Nonsihang ma’ima’ ahi’. Tinoka sumo atu pinosi po’iwi’Nyomo ahi’ na liana ka’ pikat. Pinoko po’iwi’Nyo na liana ka’ pikat, 5 sinanggohanNyomo ahi’ “liana” na aitu anu mali-maliana, aitu anu “pika-pikat” na sinanggohanNyo pihi. Pinoko taloakonNyo sumo atu balomo hi’ nalom ka’ pinihi. Sinumo atu na anu binauNyo atu sinansina.
Bau-baunyo nu atu kino uansinanyo
6-7 Napatas dodop kino uansinanyo, binasisik mule’ ahi’ na Anu Nonsihang konyo, “Uka timbalimo na banga nu langit akaong i pohi-pohintonga’an nu ue da mombagi ue, da saga’at na ia tolohangkat i langit saga’at na ia sainjoong ahi’.” Pinoko taloakonNyo sumo atu balomo hi’ tinimbali, maka’ aitumo hi’ banga nu langit na nombagi, da ue anu aita’ i bua’nyo na tinolohangkat ahi’ nokita’ mata-matangkas ka’ jinojoong ikita’ mae, ue anu akakaong mae i aluknyo na sinainjoong ahi’. Ingkop atu aya olot nu akaong kilit nu ue tiba ata’ banga nu langit na tinimbalimo hi’ langaa. 8 Tinoka sumo atu na sinanggohanNyomo ahi’ “banga nu langit” na anu aita’ mae. Pinoko taloakonNyo sumo atu balomo hi’ nalom ka’ pinihi. Sinumo atu na anu binauNyo atu kinouansinaanyo.
Bau-baunyo nu atu kino tolunsinanyo
9 Lapas atu binasisik mule’ ahi’ na Anu Nonsihang konyo, “Uka na posi po’iwi’o ahi’ na ue tiba tano’, da tano’ na ia motiis ahi’.” Pinoko taloakonNyo sumo atu, balomo hi’ nosi po’iwi’ na tano’ tiba ue. 10 Tinoka sumo atu binasisiko ahi’ na Anu Nonsihang konyo, “Atu tano’ anu moti-motiis na Kusanggohimo ahi’ katano’an, akaong mule’ ue anu nosi-nosi po’iwi, Kusanggohimo ahi’ laut.” Ingkop atu tinoaNyo na atu anu binauNyo na buu’ ahi’ ma’ima’.
11 Toka atu binasisik mule’ na Anu Nonsihang konyo, “Lubato mae iwi-iwi’ na ngahanan nu anu singkaap lubat i tano’ susumo atu kau’ anu mimbua’ tiba susumo atu bondoi sanggonyo anu lubat i tano’.” Ingkop atu balomo ahi’ mae singkaap ilubat iwi-iwi’. 12 Susumo atu mule’ ia lubat mae na kijo’ sangahan tiba sangahan maka’ ia ko posi bine-binee’nyomo ahi’. Manau’ ia lubat, ia mintuang ahi’ ia-iamo. Ingkop iwi-iwi’ na atu anu binauNyo na tinoa nu Anu Nonsihang buu’ ahi’ ma’ima’. 13 Tinoka sumo atu balomo ahi’ nalom ka’ pinihi. Sinumo atu na anu binauNyo atu kino tolunsinanyo.
Bau-baunyo nu atu kino patonsinanyo
14-15 Lapas atu binasisik mule’ ahi’ na Anu Nonsihang konyo, “Timbalimo ata’ i langit na anu jingka-jingkaon da atu na monjingkai sina tiba pihi. Da boli hi’ ia pokakana na sina ka’ pihi, tiba pontu’osian mongabali’o na tempo’ tiba susumo atu sina pompilonuan”. Ingkop pinoko taloakonNyo sumo atu balomo hi’ tinimbali. 16 Ingkop aitu mule’ Anu Nonsihang nombau aitu anu jingka-jingkaon, na ohua’ ahi’ na binauNyo. Sa’angu’ na aitu hi’ batu nu sina na binauNyo, da monjingkai sina. Aitu mule’ sa’angu’, na aitu koloa anu madi’ tahu jingkaon na monjingkai pihi. Atu mule’ to manda-mandala’ maka’ singkona hi’ binauNyo. 17 Manau’ buu’o tinimbali, na pinosi po’u-po’una’o ahi’ nu Anu Nonsihang ata’ i langit, da monjingkai mae aya katano’an, 18 da manau’ sinamo, na ata’ ahi’ batu nu sina anu mosi jingkaon na monjingkai mae aya tano’. Manau’ pihimo na aitu hi’ koloa anu madi’ tahu jingkaon na monjingkai, da ia mosi po’iwi’ ahi’ na liana ka’ pikat. Ingkop pinoko bauNyo atu iwi-iwi’ na tinoa nu Anu Nonsihang buu’ ahi’ ma’ima’. 19 Tinoka sumo atu balomo hi’ nalom ka’ pinihi. Sinumo atu na anu binauNyo atu kino patonsinanyo.
Bau-baunyo nu atu kino limansinaanyo
20 Lapas atu binasisik mule’ ahi’ na Anu Nonsihang konyo, “Uka timbalimo na batu-batuu ngahanan nu isi nu ue ngahanan nu ikan sanggonyo anu tumuu’ i ue. Tiba tomonsi’ konyo, “Timbalimo ka’ lumahap ata’ i langaa.” Pinoko taloakonNyo sumo atu balomo ahi’ tinimbali. 21 Maka’ tiba pe’e akaong isi nu laut be tinili’Nyomo ahi’ da tinimbali na susumo atu isi nu laut anu to daka-daka’, ingko-ingkot ahi’ na ngahanannyo, hagi isi nu ue ingko-ingkot ahi’ na ngahanannyo sagala ngahanan nu tomonsi’. Ingkop atu iwi-iwi’ na atu anu binauNyo na tinoaNyo buu’ ahi’ ma’ima’. 22 Tinoka sumo atu binalakaatanNyomo ahi’ na aitu aha konyo, “Komiu isi nu laut tiba isi nu ue, pilee’o ahi’ da’i-da’isan, da mongisii ue tiba laut. Tomonsi’ mule’ pilee’o ahi’ da’i-da’isan, da mongisii aya tano’.” 23 Tinoka sumo atu balomo hi’ nalom ka’ pinihi. Sinumo atu na anu binaunyo atu kinolimansinaanyo.
Bau-baunyo nu atu kino anonsinanyo
24 Ilapas atu binasisik mule’ ahi’ na Anu Nonsihang koNyo, “Timbalimo na ngahanan nu binatang anu jojoong aya i buan nu tano’, susumo atu anu manyaam, tiba binatang anu ma’ela’, tiba anu jumbolo ingko-ingkot ahi’ na ngahanan nu binatang anu ite’ tiba anu daka’ tumuu’o ahi’, da monjoongi aya tano’ koe-koewa.” Pinoko taloakonNyo sumo atu, balomo ahi’ tinimbali atina’. 25 Sinumo atu na bau-baunyo nu Anu Nonsihang nombau ngangahanan nu binatang aya i buan nu tano’. Susumo atu binatang anu manyaam, tiba binatang anu ma’ela’, susumo atu anu daka’ tiba anu ite’. Ingkop atu tinoaNyo na atu anu binauNyo na buu’ ahi’ ma’ima’.
26 Ilapas atu binasisik mule’ ahi’ na Anu Nonsihang konyo, “Uka na lahi’ Kita mombau mian, da pokakana Kita ka’ montiho mae kita, da aha ahi’ na mongkuasai iwi-iwi’ na binatang anu aya i buan nu tano’, susumo akaong isi nu laut, tiba isi nu ue, tiba binatang anu aya i katano’an, tiba ata’ tomonsi’ ahamo ahi’ na mongkuasai.” 27 Tinoka sumo atu binauNyomo ahi’ na kita mian, maka’ atu binauNyo ahi’, da montiho ahi’ Anu Nonsihang. Atu mule’ salataa binauNyo na mo’ane ahi’ ka’ boune.
28 Pinoko baunyo binalakaatanNyomo ahi’ na aitu aha, konyo, “Atina’ komiu mian pilee’o ahi’ da’i-da’isan, da monjoongi aya tano’ koe-koewa, toka-toka kijo’ mae puusnyo. Tiba mule’ montumpui akaong batu-batuu isi nu laut, tiba isi nu ue tiba batu-batuu tomonsi’. Susumo mule’ atu binatang aya i katano’an sanggonyo anu mongkohenggo buu’ ahi’ komiu na montumpui iwi-iwi’.”
29 Toka atu Ia binasisik mule’ ahi’ na Anu Nonsihang koNyo, “Hongo mae, maka’ anu okaan nu atina’ komiu mian, na ingko-ingkot ahi’ na ngahanan nu anu lubat aya i buan nu tano’, tiba susumo atu anu mimbua’ buu’ ahi’ Kubee’ da bau kaanon miu. 30 Panyo susumo mule’ atu kaanon nu binatang na susumo hi’ atu hagi hemput, sanggonyo anu lubat, tiba hagi hoon nu kau’ anu singkaap mobulou. Atu na kubee’ bau kaanon nu binatang. Maka’ iwi-iwi’ ahi’ na binatang anu tumuu’ aya i buan nu tano’, tiba batu-batuu anu jumbolo, tiba sanggonyo tomonsi’ aitu ahi’ na bau kaanonnyo.” Pinoko taloakonNyo sumo atu, na tinotu’u ahi’ balomo ahi’ aitu na binau kaanon nu binatang.
31 Tinoka sumo atu lako’ tinoaNyo na atu anu binauNyo na buu’ ahi’ tongko’ ma’ima’. Ingkop atu balomo ahi’ nalom ka’ pinihi. Sinumo atu na bau-baunyo nu atu kino anonsinanyo.

Pasal 2

Bau-baunyo nu atu kino pitunsinanyo

1 Sinumo atu na bau-baunyo nu Anu Nonsihang nombau ata’ langit tiba aya tano’, batu-batuu anu mongisii aya tano’ tiba ata’ langit. Pinoko baunyomo ahi’ iwi-iwi’, atu ano-anonsina. 2 Ingkop atu napatas dodop kinopitunsinaanyo na madi’o hi’ koanu pinaka bauNyo, Ia nilawemo ahi’. Maka’ buu’o ahi’ pinoko bauNyo iwi-iwi’. 3 Tinoka sumo atu na pinosi potadeNyomo ahi’ na aitu sina kinopopitu’nyo da baumo ahi’ sina daka’. Sina aitu na pinotade ahi’ nu Anu Nonsihang da baumo ahi’ sina pilawean, da toka hi mian sina ahi’ aitu na bau pilawean mokalajaa, ka’ lahi’ monsangke Anu Nonsihang. Maka’ mololoi’akon ahi’ Anu Nonsihang, Ia nokalajaa inganonsina, pinokobauNyomo ahi’ iwi-iwi’ tinoka sina kino popitu’nyo na Ia nilawemo ahi’ madi’o ahi’ koanu pinakabauNyo.

4 Sinumo atu na bau-baunyo nu tundulannyo nu Anu Nonsihang nombau ata’ langit tiba aya tano’.

Bau-baunyo nu Anu Nonsihang nombau atu mo-mo’ane

Ingkop bali mule’ mompinsusule’i monsisik bau-baunyo nu Anu Nonsihang i Yawe salataa nombau ata’ langit tiba aya tano’ tiba isinyo.

5 Maka’ sasalataa na susumo atu pe’e anu lubat i tano’ na ma’isa ahi’, tiba susumo atu anu osau tiba anu otugan na ma’isa hi’ ko apa-paa. Maka’ mian pe’e anu lako’ mongale’ be ma’isa ahi’ ko binaunyo na tempo’nyo atu, hagi ujan pe’e ma’isa hi’ ko binau nu Anu Nonsihang i Yawe. 6 Panyo maumo tempo’nyo atu ma’isa hi’ ko kino ujan, be aya tano’ na kino dondu’ok ahi’ lengkat mae kayong i uno nu tano’ na mohumpisi ata’ i buannyo.

7 Tinoka sumo atu lako’je ahi’ kinakup nu aitu Anu Nonsihang i Yawe na tano’ ka’ kinomponNyo ka’ binauNyo mian. Toka atu na aitumo ahi’ kinyonyoaNyo anu momoko tumuu’, na lako’ sinawohakonNyo ajo’ i suung nu aitu mian, da timbali ningkinyonyoa ka’ tinumuu’.

Bau-baunyo nu ale’ kijo’ i Eden

8 Lapas atu binaumo ahi’ nu Anu Nonsihang i Yawe na ale’^b kijo’ mae i sasuu pimbuu’an, kijo’ i Eden ka’ pinojoongnyo i atu na aitu mian anu binau-binauNyo. 9 Toka atu tinili’o ahi’ u Anu Nonsihang i Yawe, da singkaap ilubat iwi-iwi’,’ na susumo atu ngahanan nu kau’ anu singkaap to ma’ima-ima’ na montoa, tiba susumo atu kau’ anu singkaap to ma’ima-ima’ na bua’nyo, susumo atu bua’ u kau’ anu timbali okaan buu’ ahi’ ilubat ikijo’. Atu mule’ i pohi-pohintonga’an nu ale’ aitu, na tinili’ ahi’ u Anu Nonsihang i Yawe, da ilubat na aitu uangkau na kau’, aitu sangkau na kau’ na de lako’ okaan na ata’ bua’nyo na moko tumuu’ ahi’ lambaakonyo. Aitu mule’ ko uangkaunyo na de lako’ okaan na ata’ bua’nyo na moko sainsumbu’ ahi’ butong, da osumbu’o ahi’ na anu ma’ima’ tiba anu ma’idek.

10 Ue mule’ maka’ atu sangkau ahi’ na kaunyo anu nimata atu Eden ka’ noili atu ale’ da atu na nonguei ale’ aitu. Ingkop atu manau’ noilimo tinoka kayong mae sambiha’ u aitu ale’ na balomo hi’ toka nogimpa-gimpang opat na kaunyo 11 Maka’ atu sangimpang na kaunyo na Pison, aitu na noili ka’ toka nontikubi kayong i kaho nu tano’ u Hawila. Atu mule’ i Hawila na manjoo’ ahi’ na maas. 12 Atu mule’ maas anu atu i tano’ u Hawila na madi’ ahi’ ko galo-galo’nyo maas ahi’ tuleng. Ka’ aitu mule’ anu ma’ima-ima’ na nohongnyo, Damak bedola ka’ batu kidisopas na sanggonyo anu hi’ mahan na olinyo maka’ singkona hi’ atu i tano’ u Hawila.

13 Atu mule’ kino uangimpangnyo na kaunyo na Gihon. Aitu na noili ka’ toka nontikubi kayong i kaho nu tano’ u Kuus. 14 Atu mule’ kino tolungimpangnyo na kaunyo, na Tigris. Aitu na noili sasuu pimbuu’an nu kota’ u Asun. Atu mule’ kino patongimpangnyo na kaunyo, na Efrata na sanggonyo.

Bau-baunyo nu atu anu pinoto’i nu Anu Nonsihang atu hi mo-mo’ane

15 Ingkop aitu mule’ mian aitu mo-mo’ane na pinojoongo ahi’ nu Anu Nonsihang i Yawe i ale’ aitu, da mongale’ ka’ motugan, tiba mosu’an anu lubat i atu ka’ mongulus ale’ aitu. 16 ka’ pinoto’iNyo koNyo, “Toka atina’ hiyoo’ na iwi-iwi’ na bua’ u kau’ anu atu i ale’ na timbali hi’ lako’ opupu ka’ okaan. 17 Lahi’ aitu sangkau na kau’ anu momokosainsumbu’ butong da osumbu’ na anu ma’idek tiba anu ma’ima’ na boli lako’ okaan na bua’nyo, maka’ de lako’ okaan na balomo hi’ silaka atina’!”

Bau-baunyo nu Anu Nonsihang nombau atu bo-boune da bau sampohangkatnyo

18 Manau’ Ia nosibasisiko ahi’ na aitu Anu Nonsihang i Yawe koNyo, “Uka na madi’ ahi’ ko ma’ima’ na ia tumuu’ la posi sausa’nyo, uka na Kubau i ahi’ samian anu pokakana ia, da bau sampohangkatnyo.

19 Tinoka sumo atu lako’ hi’ kinakup nu Anu Nonsihang i Yawe na tano’ ka’ kinomponNyo binau binatang, ingko-ingkot ahi’ na ngahanan nu binatang anu aya i katano’an tiba anu lumahap ata’ i langaa.

Manau’ tinimbalimo binoakonNyoje ahi’ iwi-iwi’ nokijo’ hi mo-mo’ane aitu, da labot upaha sanggohi na sanggo nu binatang kijo’ sangahan tiba sangahan, da iya na sanggo anu labot ponsonggohi nu mo-mo’ane aitu, atumo ahi’ na bau sanggonyo.

20 Tinoka atu hi mo-mo’ane na laboto ahi’ pinosi sanggo-sanggohannyo iwi-iwi’ na sangahan tiba sangahan, na susumo atu binatang anu manyaam tiba anu ma’ela’. Tomonsi’ mule’ sumo hi’ atumo, laboto hi’ pinosi sanggo-sanggohannyo nakijo’ sangahan tiba sangahan. Panyo atu labot tinoanyo, iwi-iwi’ madi’ ahi’ koanu sosok na anu pokakana ia na bau sampohangkatnyo. 21 Tinoka sumo atu pinohoyoto ahi’ nu Anu Nonsihang i Yawe na aitu mo-mo’ane da binobogon, manau’ binobogono lako’je hi’ ingalaNyo na atu has sansila’ atu i butongnyo, pinoko alaNyo na aitu has sansila’ poule’o ahi’ pinoule’Nyo na aitu antok tiba kilit da poule’ sinigantum. 22 Toka atu binoaNyomo ahi’ na aitu has sansila’ ka’ toka binauNyo samian na boune, manau’ tinimbalimo na aitu boune pinoboakonNyoje ahi’ nokijo’ hi mo-mo’ane.

23 Ingkop atu manau’ ia tinongoa’o, tinoanyo be atu boune, ia kino apo-aposo ahi’ nujama’ ka’ ia binasisik hi Anu Nonsihang konyo,

“Palias, ukaje ka’ tinoka na gampangku, maka’ buku lengkat ahi’ i bukungku, antok mule’ maka’ lengkat ahi’ hiyau’, butongku ahi’ na binau.

Ingkop uka na kusanggohimo ahi’ boune. Maka’ Anu Nonsihang nombau, ingalaNyo ahi’ lengkat hiyau’ mo’ane.”

24 Ingkop aitu na mokonyo’ aya mian mosoa, hi mo’ane nupala’ii na kijo’ tumanyo tiba tinanyo ka’ toka mosa’angu’^c monsainjojo-jojoong tiba bengkele’nyo timbali sa’angu’ na luma tangga. 25 Aitu mule’ aha, tempo’nyo atu na dai’ ahi’ langgo’ na aitu mo-mo’ane tiba aitu bengkele’nyo. Panyo nanaumo atu madi’ aha ko pakean, be madi’ ahi’ ko sainsumbu’ na ambang.

Pasal 3

Bau-baunyo nu kita mian salataa nohiku Tumpu

1 Monsisik mule’ bau-baunyo nu aitu bintana’ maka’ iwi-iwi’ na ngahanan nu binatang anu binau nu Anu Nonsihang i Yawe, na aitu hi’ bintana’ na tahu mosi pande ka’ akalon. Ingkop atu kino ninsan tinokamo hi’ mae ka’ toka mae pinokilawanyo atu hi bo-boune konyo, “Pa’ mosia ii’ na atu batu-batuu bua’ u kau’ anu aya i ale’? Pa’ totu’u ii’ tenawa’Nyo iwi-iwi’ na bua’ ukau’ anu aya i ale’ boli okaan, kabai pa’ mosia?”

2 Tinaman nu atu bo-boune konyo, “Madi’ ahi’ tesa’ bua’ u kau’ aya konjo-konjoo’ aya i ale’ na maka’ buu’ ahi’ binee’ nu Anu Nonsihang da timbali lako’ okaan mami, 3 lahi’ bua’ u kau’ aitu sangkau na tinewa’ ahi’ nu Anu Nonsihang konyo, “Boli hi’ lako’ okaan, maka’ otiik pe’e madi’ ahi’ toho’, Maka’ de lako’ okaan miu na komiu silaka ahi’.”

4 Ingkop tinaaman nu aitu bintana’ konyo, “Madi’ ahi’! Te totu’u mule’ komiu silaka. 5 Sa’ lahi’ mokonyo’ tinewa’Nyo boli lako’ okaan, maka’ sinumbu’Nyomo ahi’ de lako’o okaan miu na maka’ susumo i mata tonjilamo ahi’, osumbu’o ahi’ miu na anu ma’idek tiba anu ma’ima’, komiu pokakanamo ahi’ Ia. Ingkop atu na maka’ hi Anu Nonsihang na sinumbu’Nyomo ahi’ na aitu, mokonyo’ komiu tinewa’Nyo na lako’ mongkaan bua’ u kau’ aitu.”

6 Tinoka atu hi bo-boune na tinoanyo na kau’ aitu, na ma’ima’ ahi’. Tiba bua’nyo na mosa’angu’ hi’ ma’ima’ na nyamitnyo na de okaan. Tinutugannyo konyo, “Uka na mosa’angu’ hi’ ma’ima’ na de timbalimo monsuak anu ma’ima’ tiba anu ma’idek. Salataa tinutugannyo susumo atu balomo hi’ lako’ pinupunyo na aitu bua’ ukau’ aitu ka’ kinaannyo, ka’ binee’annyo tiba aitu langkai’nyo. Tinoka atu hi langkai’nyo laboto hi’ ingalanyo ka’ singkona ia nongkaan. 7 Ingkop salataa pinoko kaan nu aha na aitu bua’ u kau’ na susumo i mata tinonjilamo ahi’, joo tinoloduku tutuk pinianyo be talu’ langgo’. Salataa pinianyo be talu’ langgo’, lako’je ahi’ aha nongkotu’ hoon nu kau’ ada, maka’ atu hoon nu kau’ ada da bolaa ka’ tinuu’nyo ka’ pinolomonnyo aya i butong da binau pakean.

8 Ingkop atu manau’ tinobuungo mae na pomuhon nu baleba’ tinoka ninggili na sina, labot ihongo nu aitu aha be bonutu nu Anu Nonsihang i Yawe lewa’ mololo atu i ale’. Manau’ labot ihongo nu aha be bonutu nu Anu Nonsihang i Yawe, aha nopalaimo ahi’ ka’ toka nitatampung atu i sambiha’ u pu’u nu kau’ konyo, da boli hi’ toka mae aha nutoa-toa nu Anu Nonsihang i Yawe. 9 Panyo tinoka atu hi Anu Nonsihang i Yawe na tokamo hi’ mae ilagaNyo na aitu mo-mo’ane ka’ pinokilawanyo konyo, “Adam, iyaa mae na oko?”

10 Tinaman i Adam konyo, “Misa’ aya ahi’ na aku, labot ahi’ ihongongku na bonutuUm, panyo ka’ manau’ laboto ihongongku na bonutuUm aku nabuhuko ahi’ lako’o ahi’ aku nitatampung maka’ aya hi’ aku langgo’ ahi’.”

11 Tinaman nu Anu Nonsihang konyo, “Te mosia ka’ tutuk sinumbu’umo na oko langgo’? Te iyee na nomposumbu’ hiyoo’? Atina’ maka’ da malingkoyaa ahi’ lako’o kinaanum na bua’ u kau’ uka anu tine-tinewa’Ku boli lako’ okaan”

12 Tinaman i Adam konyo, “Ii’, panyo ka’ tesa’ aitu boune anu bibinee’um mae, da bau sangalungku na nombee’ mae mokonyo’ kinaanku.”

13 Tinoka sumo atu pinokilawamo ahi’ nu Anu Nonsihang i Yawe atu hi bo-boune konyo, “Te mosiamo ka’ sinumo atina’o na anu binauum?”

Panyo tinoka atu hi bo-boune na aitu hi’ bintana’ na pinisala’annyo, konyo, “Te misa’ aitu bintana’ na tokamae nongakali aku mokonyo’ kinaanku.”

14 Toka atu ilalinakonNyomo ahi’ atu hi bintana’ na sinamposisik nu Anu Nonsihang i Yawe koNyo,

“Atina’ maka’ lako’o hi’ oko nongakali atu boune, na uka na oko kutotobi’akono ahi’ da iwi-iwi’ na binatang anu manyaam tiba anu ma’ela’ na lahi’ sa-sa’angu’ oko na monta’up uka totobi’Ku.

Obunsang sina-sina uka na oko jumbolomo ahi’ i tano’ na mambaa, anu mule’ ukaan maka’ oko mongkaano ahi’ bonyo nu tano’ na lako-lakonyo uka dai’ oko tumuu’.

15 Atina’ mule’ beleyum tiba ajo’ boune Kutili’o ahi’ da saja’o ahi’ mompahaili’.

Lambaakonyo ahi’ saidi’mae lee’um tiba lee’ nu ajo’ boune saja’o ahi’ mompahaili’.

Saidi mule’ mae ajo’ boune na ko lee’nyo ahi’ samian mo’ane na mompopuus oko bintana’ da labot oko monsa’u i tengkenyo oko nubalosi nu poso’ na ubakum.”

16 Lapas atu Ia binasisik mule’ ahi’ atu hi bo-boune konyo,

“Atina’ maka’ laboto hi’ oko nohongo ka’ nombatuk sisik u bintana’ na kutili’o ahi’, da manau’ oko mongkandung hiko’ na kupokonjoo’ ahi’ na lusa’ ka’ bolije na manau’ oko mompohampemo maka’ tahahu hi’ Kupokonjoo’ a lanit.

Panyo naumo na sumo atu be tataap ahi’ beleyum mongkahanda’i langkai’um, ka’ tataap ahi’ ia na montu’a-tu’anyoi oko.”

17 Lapas atu Ia binasisik mule’ ahi’ atu hi mo-mo’ane konyo,

“Atina’ maka’ oko nohongomo ahi’ ka’ nombatuk anu pinokau nu bengkele’um, kinaanumo ahi’ na bua’ ukau’ uka anu tine-tinewa’Ku boli okaan.

Maka’ Kutotobi’akono ahi’ na aya tano’ da obunsang u uka na mongabali’o ahi’, da lambaakonyo ahi’ oko langkai’, susumo atu lako’ oko mongkaeng na susa’o ahi’ tongko’ ka’ lusa’, oko mohumpakje ahi’ kaanon anu lengkat i tano’.

18 Aya mule’ tano’ maka’ Kutili’o ahi’, da susumo atu lako’ oko mongkaeng na lubato hi’ mae tiba hemput anu ko hii’nyo.

Susumo mule’ atu anu nukaan, maka’ anumo hi’ lubat lengkat i tano’,

19 na uka dai’ tu-tuu’ ka’ oko susa’ ahi’ ka’ lusa’ na mokalajaa mohumpakje ahi’ kaanon.

Saidi’ mule’ mae maka’ oko silakamo ahi’ ka’ minsusule’ timbali tano’, maka’ atina’ butongum lengkat ahi’ i tano’ a binau.

Loloi’nyo saidi’ mae manau’ silakamo ia mahu’o ahi’ ka’ timbali tano’.”

20 Tinoka atu hi mo-mo’ane anu sinanggohan i Adam, sinanggohannyomo ahi’ i Hawa na aitu bengkele’nyo, maka’ ia ahi’ na tina nu iwi-iwi’ na mian anu tumuu’.

21 Lapas atu lako’je ahi’ ingala nu Anu Nonsihang i Yawe na kilit nu potu’on ka’ binauakonNyo pakean hai Adam tiba aitu bengkele’nyo i Hawa, ka’ pinopakeakonNyo atu hi aha.

22 Tinoka sumo atu Ia nosi basisiko ahi’ na aitu Anu Nonsihang i Yawe, koNyo, “Uka na pokakanamo i ahi’ Kita, maka’ nu posi sumbu’o ahi’ na anu ma’ima’ tiba anu ma’idek. Jo uka na de la opobakas na jumo mule’ ahi’ lako’ upaka pupu ka’ nukaan na aitu bua’ ukau’ anu momoko tumuu’, na maka’ aha tumuu’o ahi’ lambaakonyo.” 23 Ingkop atu da boli hi’ jadi sumo atu, na sinaimo ahi’ nu Anu Nonsihang i Yawe atu i ale’ aitu na aitu hai Adam tiba aitu bengkele’nyo i Hawa, ka’ pinokauNyo da toka aha mongale’ i tano’ anu pinombauan nu Anu Nonsihang aitu i Adam.

24 Toka atu na koanu mule’ ahi’ pinojoongNyo atu i sasuu pimbuu’an nu tano’ Eden aha hi’ pa’ sangkuka na kerub, da monjagai ka’ aitu mule’ anu susumo bajak panyo atu moak ahi’ susumo intoo ko beho-behos ka’ lewa’ mimpalela sasuu mokijo’ tiba sasuu mouka mae ponjagainyo, da boli koanu lako’ mongohanii aitu kau’ anu momoko tumuu’ lambaakonyo.