Efesus

1

I Paulus nombuka’ sisik

1 Sulat aya lengkat hiyau’ i Paulus. Aku na mian ahi’ anu pinotade nu Anu Nonsihang tiba nompokuasa mae aku da mombutongakon i Yesus, maka’ totonggon ahi’ posipongka’oho’ ahi’ nu Anu Nonsihang na nombau sumo atu. Sulat aya kutulis da kupakatu hi komiu mian anu i kota’ u Efesus, panyo misa’ hi’ iwi-iwi’ na mian, lahi’ aha mian nu Anu Nonsihang anu mompolinganga’ i Yesus, aitu hi’ mian anu tataap ahi’ mombatuk i Kristus Yesus.
2 Kupoitakon ahi’ da bisa-bisa’ Anu Nonsihang, uka Tumanto ka’ Tumpunto i Yesus Kristus, na mombee’ balakaat hi komiu to utu-utus da boli hi’ koanu okasusa’akon miu, ka’ saja’ hi’ nusangalui nu Tumpu.

Balakaat anu pinosibee’ nu Tumpu hi aha anu pinile’anNyo

3 Ounde’o ahi’ na Anu Nonsihang, uka Tuma nu Tumpunto i Yesus Kristus! Maka’ manjoo’ ahi’ na balakaat nu Tumpu lengkat i sulugaa’ binee’Nyo mae hi kita, kalana kita nosa’angu’ ahi’ tiba i Kristus. 4 Kalana kita nosa’angu’o hi’ hi Yesus, maka’ kita pinile’an ahi’ nu Anu Nonsihang salataa pe’e ma’isa hi’ Ia nompotimbali aya dunia. Alati’nyo kita kinalibosanNyomo ahi’ ka’ tinantoNyo da kita molonde’ ahi’ ka’ madi’ ahi’ ko sala’ na nusiho’ mae nu Tumpu, maka’ kita mosa’angu’ ahi’ ka’ i Kristus. 5 Kalana Anu Nonsihang mongkalibosi kita maka’ salataa pe’e tinogitosanNyomo ahi’ da mohangkat kita timbali to ana-anakNyo, kalana uka anu Nubau i Yesus Kristus saidi’ mae, maka’ sumo hi’ atu na pongka’oho’Nyo tiba pinontogitosiNyo salataa pe’e.
6 Kita na pantasnyomo ahi’ na mongunde’ Anu Nonsihang, kalana kita kinalibosanNyomo ahi’ ka’ binee’anNyo balakaat anu hi’ tahuu manjoo’ hi kita kalana nosa’angu’o ahi’ hi Yesus Kristus AnakNyo Anu Nukalibosi. 7 Aitu na mokonyo’ sailambaa posi AnakNyo uka i Yesus na binee’Nyo mae, da baso’Nyo anu pinojuju i kau’ salip kita pinolapasNyomo ahi’, ingampunanNyomo ahi’ na to dosa-dosa’to, kalana libos nu Anu Nonsihang anu la tutuk binee’Nyo mae hi kita. 8 BinauNyo sumo atu maka’ Ia na tahuu hi’ mongkalibosi kita, maka’ libosNyo anu binee’Nyo mae hi kita na molabi-labi ahi’, maka’ Anu Nonsihang na monsuak ahi’ ka’ monsumbu’ iwi-iwi’.
9 Ingkop uka anu tinanto nu Anu Nonsihang na sinisikNyomo ahi’ hi kita — aitu tantoanNyo anu uka mae dai’ bininiNyo hi kita mian, panyo sumo uka na sinisikNyomo ahi’ hi kita. Kalana totonggon ahi’ sumo hi’ atu na pongka’oho’Nyo salataa pe’e aitu hi’ kita mosa’angu’ hi Kristus. 10 TantoanNyo aitu da iwi-iwi’, maumo anu kita’ mae i sulugaa’ tiba anu aya i dunia timbalimo hi’ mosa’angu’ tiba i Kristus, da Ia ahi’ na montu’a-tu’anyoi. Ingkop aitu na nupopupusakonje ahi’ nu Anu Nonsihang manau’ tokamo i tempo’nyo.
11 Maka’ pongka’oho’Nyo na salataa pe’e kita pinile’anNyo da timbalimo hi’ mianNyo ka’ moualisi ahi’ sumo to ana-anakNyo maka’ kita mosa’angu’ ahi’ tiba i Kristus. Ingkop atu iwi-iwi’ na ingatun ahi’ nu Anu Nonsihang sumo hi’ pongka’oho’Nyo, da tantoanNyo uka mae sasalataa Nubuntuimo ahi’. 12 Ia na nompile’i mae kami da kamimo ahi’ na imona taha’iman hi Kristus da timbalimo hi’ momboa unde-unde’an ka’ pompopodaka’an sanggoNyo.
13 Ingkop komiu na singkonamo hi’ susumo atu. Komiu tinimbalimo hi’ mianNyo, manau’ pinokohongomo miu na sisik anu totu-totu’u, aitu Lele Ma’ima’ anu nomposalamat komiu. Manau’ pinolinganga’o miu na Lele Ma’ima’ aitu, komiu nompolinganga’ i Yesus Kristus, na pinousokakonNyomo ahi’ hi komiu na KinyonyoaNyo da bau pontu’osian komiu na posi anuNyomo ahi’.
Balu-balu’nyo nu bundak, komiu binundakNyomo ahi’ nu Kinyonyoa nu Tumpu anu hi’ pinokotipo’akonNyomo mae hi kita. 14 Ka’ Kinyonyoa nu Tumpu aitu na monjamin saidi’ mae kita na tio-tio ahi’ montalima iwi-iwi’ na anu tinipo’akon nu Anu Nonsihang hi kita anu tinimbalimo mianNyo. Kalana KinyonyoaNyo aitu, maka’ kita monsumbu’o ahi’ binayano ahi’ mobonto na olinyo nu anu pinontobusakon dosa’to. Ingkop uka poule’ ahi’ ku’ulit, imbo’ ahi’ da kita mongunde’ Anu Nonsihang anu Matangkas ka’ anu Tahuu jingkahahakan.

I Paulus mondo’a-do’aakon aha anu pinompakatuakonannyo sulat aya

15 Ingkop atu na mokonyo’ manau’ ihongongkumo i lele komiu totu-totu’u hi’ mompolinganga’o i Yesus, ka’ komiu mongkalibosi ahi’ iwi-iwi’ na mianNyo, 16 aku na saja’ hi’ tolosalamat hi Anu Nonsihang kalana komiu. Tempo’nyo aku balado’a na singkona hi’ aku mondo’aakon komiu hi Anu Nonsihang. 17 Aku momoita hi Anu Nonsihang aitu Tuma anu Jingka-jingkahahakan, anu Nusangke i Yesus Kristus, Tumpu anu obatukinto, da Nubee’i KinyonyoaNyo da matiusok i kinyonyoa miu. Da komiu timbalimo hi’ monsuak ka’ monsumbu’ bau-baunyo nu Tumpu da komiu tahuu hi’ mompakapalingkoya totu-totu’u na bau-baunyo nu Anu Nonsihang.
18 Kupoitakon ahi’ hi Anu Nonsihang da Nupotuka’akon hi komiu, da malingkoyaa ahi’ na anu pinoguhatakonNyo hi komiu tempo’nyo Ia nolaga komiu da tinimbali to ana-anakNyo. Aku balado’a da komiu singkona hi’ monsumbu’ mosa’angu’ hi’ matangkas na angga’nyo ualis anu madi’ ko gampanyo tiba balakaat anu pinoguhatakonNyo hi kita mianNyo. 19 Kupoitakon ahi’ da komiu singkona hi’ monsumbu’ tahuu hi’ liba-liba’ na kuasa anu binee’Nyo hi kita anu mompolinganga’. 20 Kuasa mule’ aitu anu pinakeNyo montulungi kita na gampanyo hi’ kuasa anu pinakeNyo poule’ nombulaakon i Kristus uka Ia silaka, ka’ nombee’ tampat hi Kristus da sumuhang i sasuu koananNyo kita’ mae i sulugaa’ gampanyo Ia. 21 Aitu mule’ i Kristus mompalenta na tahuu hi’ matangkas na kuasaNyo, maka’ iwi-iwi’ na kuasa nu mian, maumo aha pamalenta, to tomu-tomundo’ tiba to se-setan, be Ia ahi’ na tahuu matangkas. Ingkop i Kristus na misa’ ahi’ la mongkuasai aya i dunia, panyo lambaakonnyo hi’ saidi’ mae. 22 Maka’ binee’ ahi’ nu Anu Nonsihang hi Kristus na haak da mongkuasai iwi-iwi’. BinauNyo hi’ sumo atu da i Kristus ahi’ na montu’a-tu’anyoi iwi-iwi’ da bau kapentingan nu jema’at. 23 Maka’ jema’at na aitu hi’ butong i Kristus, ka’ pinosampa’ ahi’ i Kristus anu nompasampa’ iwi-iwi’ na anu mongkohenggo aya i dunia tiba kita’ mae i langit.

2

Kita montumpui kantumuu’an anu bu’ou na lengkat hi’ Kristus

1 Ingkop ma’isa pe’e komiu pinosa’angu’ tiba i Kristus, sabenanyo na komiu sinilakamo ahi’ na pontoa mae nu Tumpu, maka’ butong na dai’ tutuu’ panyo kinyonyoa na sinilakamo ahi’, kalana komiu saja’ hi’ molanggan palenta nu Anu Nonsihang tiba pongka’oho’Nyo ka’ saja’ tumuu’ i uno nu dosa’. 2 Tempo’nyo komiu dai’ saja’ mombatuk ka’ montoluk bauon nu dunia. Ingkop komiu pe’e be uka mae na dai’ ahi’ singkona nombatuk palenta tiba pongkaoho’ i Lusupen anu mongkuasai iwi-iwi’ na to se-setan anu ata’ mae i langaa. Ingkop lambaakonnyo sumo uka i Lusupen na dai’ ahi’ mokalajaa i uno nu kinyonyoa nu mian anu madi’ mompolinganga’ Tumpu ka’ madi’ matialuk hi Anu Nonsihang.
3 Maka’ uka mae kita iwi-iwi’ na singkona hi’ pokakana na mian koda-koda’isan, mombau ahi’ anu ma’ide-idek, ka’ mompotuhu pongka’oho’ nu kinyonyoa salapis. Maka’ kita gampanyo hi’ mian saga’at, loloi’nyo Anu Nonsihang na pinusamo ahi’ hi kita kalana nombaumo hi’ ma’ide-idek. Ingkop kita tumuu’ na pantasnyomo ahi’ na Nuhukum nu Anu Nonsihang.
4 Panyo atu Anu Nonsihang na tahuu hi’ manonong ka’ tahuu hi’ mongkalibosi kita. 5 Mokonyo’ Ia poule’ hi’ nompotumuu’ kita gampanyo i Kristus. Nanaumo kita na sabenanyo sinilakamo ahi’ kalana madi’ matialuk hi Ia. Panyo kita binee’anNyo hi’ kantumuu’an anu bu’ou gampanyo i Kristus. Ingkop totonggon ahi’ libos nu Anu Nonsihang anu la tutuk binee’Nyo mae, aitu komiu pinosalamatNyomo ahi’.
6 Kalana kita nosa’angu’o ahi’ tiba i Kristus Yesus, maka’ kita poule’ hi’ binulaakon nu Anu Nonsihang gampanyo Ia, da kita singkona hi’ mompalenta tiba Ia kita’ mae i sulugaa’. 7 Binau nu Anu Nonsihang susumo atu da saidi’ mae iwi-iwi’ na mian buu’ ahi’ monsumbu’ bau-baunyo nu libosNyo anu madi’ opokosisik, maka’ tahuu hi’ manonong na Ia. Ingkop libosNyo aitu na pinotoaNyomo ahi’ hi kita anu nosa’angu’o ahi’ tiba i Kristus Yesus!
8-9 Anu Nonsihang na mongkalibosi hi’ komiu, mokonyo’ Ia nomposalamat komiu kalana komiu nompolinganga’o ahi’ i Yesus ka’ tinaha’iman hi Ia. Kasalamatan miu na misa’ hi’ ko kalana anu pinosibau miu. Aitu na totonggon ahi’ libos nu Tumpu anu la tutuk binee’Nyomo mae hi komiu. Ingkop boli hi’ koanu sala’ samian na mompopotangkas butong kabai monsisik, Anu Nonsihang nomposalamat mian kalana saja’ mombau anu ma’ima’.
10 Kasalamatan na posikalajaa ahi’ nu Anu Nonsihang. Kita anu nosa’angu’ tiba i Kristus Yesus, na pinotimbaliNyomo ahi’ mian bu’ou. Loloi’nyo opokoalanto ahi’ na montoluk kalajaa anu ma’ima’, anu tinanto nu Anu Nonsihang uka pe’e mae da otoluk nu kita mian anu mompolinganga’ Ia.

Mian nu Yahudi tiba anu misa’ pinosa’angu’ ahi’ i uno i Kristus

11 Ingkop toka hi komiu to utu-utus na opositutugi ahi’, komiu na misa’ hi’ ko mian nu Yahudi. Uka mae na komiu sinanggohan ahi’ nu aha mian nu Yahudi, bangsa anu madi’ sinunat. Aha mian nu Yahudi na mompopotangkas butong ka’ mosiakut ahi’ bangsa anu sinunat. Ingkop atu sunat na lahi’ pontu’osian anu binau nu manusia i butongnyo. 12 Anu palalu oinau’ miu na aitu hi’ uka mae komiu madi’ hi’ monsumbu’ i Kristus. Komiu na madi’ hi’ ko tinekeng mian anu pinile’an nu Anu Nonsihang, lahi’ nuanggap mian anu tumoka. Maka’ uka mae na komiu madi’ hi’ ko haak mohumpak bagian lengkat i anu tinipo’akon nu Tumpu hi aha mianNyo. Tempo’nyo atu komiu tumuu’ aya i dunia na madi’ hi’ kino taha’imanan maka’ komiu na ma’isa hi’ monsumbu’ Tumpu.
13 Uka mae na komiu totu’u hi’ majo’on ahi’ ka’ Anu Nonsihang. Panyo sumo uka na komiu ingohanimo ahi’ ka’ Ia, kalana komiu nosa’angu’o ahi’ tiba i Kristus Yesus, maka’ i Yesus sinilaka i kau’ salip nompojuju baso’ da pinontobusakonNyo dosa’to.
14 Kalana i Kristus, maka’ kita kinopianakonNyomo ahi’ ka’ pinosa’angu’Nyo na mian nu Yahudi ka’ mian anu misa’ pe’e Yahudi da tinimbalimo hi’ sa’angu’ a bangsa. Ingkop tempo’nyo kita mosa’angu’ tiba i Kristus, na pontoa mae nu Tumpu kita timbalimo hi’ mianNyo anu bu’ou, ka’ pokakanamo ahi’. De oboamo i pimpi’ anu mongompo, maka’ nohobo’o ahi’ madi’o hi’ mouali.
15 Ingkop atulan nu agama Yahudi hagi to pale-palentanyo na ihapuso ahi’ i Yesus tempo’nyo Ia binau hana’u i kau’ salip da ohua’ na bangsa aitu timbalimo hi’ mosa’angu’ mian bu’ou, anu mosa’angu’ tiba Ia. Ingkop sumo hi’ atu na anu binau i Kristus nongkopianakon mian nu Yahudi ka’ mian anu misa’ Yahudi.
16 I Kristus ahi’ na nongkopianakon aitu ohua’ na bangsa da kinopian ka’ Anu Nonsihang uka tempo’nyo Ia sinilaka i kau’ salip. Ingkop loloi’nyo kita mian na madi’o hi’ dai’ mouali, maka’ kinopianakonNyomo ahi’ na kita samian toka samian tiba Anu Nonsihang, pasasawe’nyo madi’o hi’ mouali.
17 Aitu na mokonyo’ i Kristus tinoka da toka mae nongkopianakon to bangsa-bangsa, mau mian nu Yahudi anu uka mae nuanggap ohani ka’ Anu Nonsihang, mau mule’ mian anu misa’ Yahudi uka mae nuanggap majo’on ka’ Anu Nonsihang. 18 Sumo uka kalana nosa’angu’o ahi’ i Kristus, maka’ kita iwi-iwi’ kino haak ahi’ toka hi Tuma, ka’ kita ko posi Kinyonyoa nu Tumpu i uno nu kinyonyoanto.
19 Ingkop komiu anu misa’ Yahudi misa’o hi’ la anu tumoka tiba madi’ ko haak. Panyo uka na komiu nombatuko ahi’ Ia tinimbalimo hi’ mianNyo. Ka’ komiu singkona hi’ nombatuko ahi’ timbali keluarga nu Anu Nonsihang.
20 Kita iwi-iwi’ na balu-balu’ ahi’ nulaigan anu lako-lakonyo obau ka’ opotinjo ata’ i pundasi anu obau lengkat i batu anu to daka-daka’, aitu batu na monggambalakon ahi’ aha to na-nabi tiba to mia-mian anu pinotade nu Anu Nonsihang tiba nompokuasa mae da mombutongakon i Yesus. Maka’ batu pundasi anu tahuu palalu, na aitu hi’ i Kristus Yesus. Ia ahi’ na suba-subanyo. 21 Ingkop kita samian toka samian tempo’nyo mosa’angu’ tiba i Kristus, na susumo i batu na saja’ hi’ nu unsu-unsun ma’ima-ima’ da bau laigan nu Tumpu, aitu laigan anu molonde’ anu oposipotade hi Tumpu. 22 Kalana tumuu’ mosa’angu’o hi’ tiba i Kristus, maka’ komiu singkona hi’ lako-lakonyo opotinjo balu-balu’nyo nu laigan tiba to mia-mian saga’at, da bau laigan kajojoongan nu Anu Nonsihang, tiba Kinyonyoa nu Tumpu na jojoong ahi’ i laigan aitu.

3

I Paulus mokalajaa hi mian anu misa’ Yahudi

1 Aitu na mokonyo’ aku, i Paulus, tinalungku’ nu mian kalana aku mokalajaa hi Kristus Yesus da bau kapentingan miu anu misa’ ko mian nu Yahudi.
2 Kugantang toho’o hi’ ihongo miu na aitu Anu Nonsihang na tahuu hi’ manonong toka hiyau’ maka’ binee’anNyo hi’ kalajaa na aku da monsisikakon Lele Ma’ima’ hi komiu anu misa’ pe’e mian nu Yahudi.
3 Tiba hiyau’ na sinisik ahi’ mae nu Anu Nonsihang na aitu tantoanNyo anu dai’ bininiNyo, susumo uka mae anu toho’o tinulisku i tampu’un nu sulat aya, panyo madi’ ko manjoo’ na anu tinulisku. 4 Ingkop de komiu mombasa’ anu tinulisku aitu na komiu timbali hi’ mangalati’ i anu sinumbu’ku na bau-baunyo nu tantoan nu Anu Nonsihang anu uka mae dai’ binini hi manusia, panyo manau’ tinoluk i Kristus. 5 Uka pe’e mae na ma’isa hi’ ko toho’ sinisik nu Anu Nonsihang, dai’ ahi’ bininiNyo hi manusia. Panyo sumo uka na binaumo hi’ nu Kinyonyoa nu Tumpu da posi Anu Nonsihang ahi’ na mompalingkoyaakon anu dai’ bininiNyo hi aha anu pinosipotade nu Anu Nonsihang da mokalajaa hi Ia, aitu aha anu pinotade nu Anu Nonsihang tiba nompokuasa mae da mombutongakon i Yesus ka’ to na-nabi.
6 Maka’ aitu anu dai’ bininiNyo na sumo hi’ uka: aha anu misa’ mian nu Yahudi tiba mian nu Yahudi, na bubuu’ ahi’ montalima balakaat nu Anu Nonsihang, aitu aha na sa-sa’angu’o hi’ tinimbali ngangahanan Nubutong i Kristus. Tiba atu aha na singkonamo hi’ buu’ montalima kakopianan anu tinipo’akonNyo. Ingkop atu na mokonyo’ sumo atu, kalana aha nohongomo hi’ Lele Ma’ima’, loloi’nyo aha iwi-iwi’ pinosa’angu’o ahi’ tiba i Kristus Yesus.
7 Kalana kuasa tiba libos nu Anu Nonsihang anu la tutuk binee’Nyo mae, atu na mokonyo’ aku tinimbali botuanNyo da montoluk kalajaa anu binee’Nyo mae, aitu mompokapotakon Lele Ma’ima’. 8 Ingkop aku na de opokakanaakon hi mian saga’at iwi-iwi’ na anu nompolinganga’o, na aku na pontoa mae nu mian na madi’ hi’ ko kali-kaliangannyo.
Panyo Anu Nonsihang na tataap ahi’ nombee’ mae hiyau’ kalajaa monsisikakon Lele Ma’ima’ hi anu misa’ pe’e mian nu Yahudi, bau-baunyo nu kakaya’an i Kristus anu madi’ opokosisik nu kita mian tiba opokobilang anu madi’ ko kamingkotannyo. 9 Anu Nonsihang ahi’ na nombau aya dunia tiba langit ko’e-ko’ewa ka’ nontoluk anu toho’ tinantoNyo. TantoanNyo aitu anu dai’ bininiNyo uka mae, panyo sumo uka na pinalingkoyaakonNyomo ahi’. Aku na pinile’an nu Anu Nonsihang da mompalingkoyaakon hi mian iwi-iwi’ da aha buu’ ahi’ monsumbu’.
10 Ingkop sumo uka na kita iwi-iwi’ pinosa’angu’Nyomo ahi’ da timbali jema’atNyo. Kita pinosa’angu’Nyo na ko kakonaannyo ahi’ da kita ahi’ na mompotoa hi aha pamalenta tiba anu montu’a-tu’anyoi kita’ mae i sulugaa’ tiba langit, tahahu hi’ monsuak na Anu Nonsihang. 11 Aitumo ahi’ na kakonaanNyo nu tantoanNyo salataa pe’e, uka anu sinelesaikanNyomo ahi’ kalana anu binau i Kristus Yesus Tumpunto.
12 Ingkop kita anu nompolinganga’o i Kristus na nosa’angu’o ahi’ tiba Ia. Kita binebaso ahi’ madi’o hi’ kita mabuhuk na toka monsamposisik Tumpu.
13 Atu na mokonyo’ kupoita hi komiu da boli hi’ komiu meat ka’ kojoa na mohongo i lele anu tina’upku i talungku’an. Komiu na lahi’ bangga’, kalana lusa’ anu tina’upku.

Do’a i Paulus

14 Atu na mokonyo’ aku nompodupu ka’ matindumon balado’a hi Anu Nonsihang Tuma. 15 Ka’ Ia na Tuma ahi’ nu kita iwi-iwi’ maumo kita anu aya i dunia maumo anu kita’ mae i sulugaa’.
16 Aku balado’a hi Anu Nonsihang Tumpu Anu Mata-matangkas da bisa-bisa’ ahi’ KinyonyoaNyo na mompokododo kinyonyoa miu. 17 Aku balado’a da komiu mintoong ahi’ madodo-dodo i libos u Anu Nonsihang, da pasasawe’nyo komiu taha’iman ahi’ ka’ madodo ahi’, susumo i kau’ bakatnyo na minsoop ahi’ male-leeng mokayong i tano’ ka’ madodo, tiba susumo i laigan anu pinotinjo i pundasi batu da madodo. Bisa-bisa’ ahi’ sumo atu na komiu tumuu’ i uno nu libosNyo.
18 Aku balado’a da bisa-bisa’ ahi’ komiu tiba iwi-iwi’ na mian anu nompolinganga’o da sainsumbu’ ahi’, aitu libos i Kristus hi kita na tahuu hi’ ewa, ka’ tahuu hi’ mantan, ka’ tahuu hi’ matangkas, ka’ tahuu hi’ maleeng.
19 Maka’ de la pontutugi nu kita mian na madi’ hi’ ko opokosumbu’ iwi-iwi’ na bau-baunyo nu libosNyo, maka’ molingkudui ahi’ iwi-iwi’ na kapandean nu manusia. Aku balado’a da bisa-bisa’ komiu monsumbu’ ahi’ libos i Kristus aitu, da pasasawe’nyo komiu mobuke’ ahi’ nu Kinyonyoa nu Tumpu ka’ saja’ opia miu na Ia ahu-ahum tiba komiu.
20 Ounde’ ahi’ na Anu Nonsihang, kalana kuasaNyo na tahuu hi’ daka’ na mokalajaa i posi-posi kantumuu’anto. Maka’ kalana kuasaNyo hi’ aitu, Anu Nonsihang na Nupokoala ahi’ na mombau anu tahuu manjoo’ molingkudui anu opoitanto ka’ anu otuka’ i kinyonyoanto.
21 Ingkop iwi-iwi’ na unde-unde’an lahi’ toka hi Ia. Lahi’ Ia na ingunde’ nu mian naipuan tiba ounde’ nu jema’at, ka’ ounde’ nu mian anu dai’ tutuu’ susumo uka tiba anu lambaakonnyo saidi’ mae, maka’ Ia ahi’ na nombee’ mae hi kami AnakNyo i Kristus Yesus! Amin!

4

Mian anu mompolinganga’ na pinosa’angu’o ahi’ tinimbali butong i Kristus

1 Aitu na mokonyo’ aku, mian anu tinalungku’ kalana mokalajaa hi Tumpu, na mompokinde’ ahi’ komiu da kantumuu’an miu pokakana hi’ palenta nu Anu Nonsihang tempo’nyo Ia nolaga komiu da tinimbali mianNyo.
2 Boli hi’ komiu monggagau’ butong na tahuu ma’ima’ ka’ mian saga’at. Boli kasan hi mian. Ka’ boli hi’ malia’ pusa panyo opotoa ahi’, na komiu mongkalibosi samian tiba samian, aitu maintulu-tulungian. 3 Kinyonyoa ahi’ nu Tumpu na nomposa’angu’ komiu, ingkop balausaha ahi’ na monjaga posa’angu’an aitu. Monjaga mule’ posa’angu’an aitu, na lahi’ sa-sa- sa’angu’ tumuu’ kopian samian toka samian.
4 Kita samian toka samian tinimbalimo hi’ sa’angu’ a ngangahanan nu butong, aitu butong i Kristus. Kita iwi-iwi’ na binee’anNyo ahi’ Kinyonyoa nu Tumpu anu gampanyo. Kita ilaga ahi’ nu Anu Nonsihang da gampanyo ahi’ na taha’imanan. 5 Kita anu bubuu’ mompolinganga’ Tumpu na pokakanamo ahi’, sa-sa’angu’o ahi’ na taha’imanan tiba sa-sa’angu’o ahi’ na palamandiam. 6 Ingkop kita iwi-iwi’ na lahi’ sa-sa’angu’ na Anu Nonsihang ka’ Tuma. Ia na Anu hi’ mompalenta aya sandu-sandunia ka’ i kita’ mae. Ia na toka mae jinojoong i kinyonyoa nu kita iwi-iwi’. Ka’ binalakaataNyo iwi-iwi’ na mianNyo da opokoala na mombau anu mokobangang.
7 Ingkop kita mian samian toka samian na nontalimamo ahi’ anu pinosibebe’Nyo mae hi kita anu binee’ i Kristus. 8 Anu aitu na polo’o hi’ tinipo’akonNyo naipuan konyo,
“Manau’ Ia menaango i palaang, na poule’ hi’ Ia minsusule’ mokita’ i tampat anu mosipatangkas.
Ka’ manjoo’ ahi’ na tawanan Nuboa; ka’ toka hi’ Nubee’i balakaat anu ma’ima’ hi manusia.”
9 Opalahatikan ahi’ na anu sinisik nu anu nontulis unde-unde’an konyo manau’ Tumpu menaango, na Ia “poule’ hi’ minsusule’ mokita’.” Ingkop de osisik poule’ minsusule’ mokita’, na patunyo i Kristus toho’o ahi’ nintatau’ nokayong. Alati’nyo Ia toho’o hi’ nintatau’ nokayong i tampat anu kayong mae i babatungo. 10 Manau’ Ia nokopokayongo i dunia, uka na Ia poule’o hi’ minsusule’ mokita’ i tampat anu tahuu hi’ matangkas anu madi’ ko lunduannyo, da iwi-iwi’ na aya dunia tiba kita’ mae langit na buu’ ahi’ mobuke’ nu kuasa nu Tumpu.
11 Ingkop anu tinipo’akon aitu, na i Kristus nosibebee’i hi’ hi kita kamampuan lengkat i Kinyonyoa nu Tumpu anu madi’ pokakana samian toka samian. Maka’ koanu hi’ binee’anNyo kamampuan da tinimbali mian anu pinotade nu Anu Nonsihang tiba nompokuasa da mombutongakon i Yesus. Koanu hi’ binee’anNyo kamampuan timbali nabi da monsisikakon poto’ion nu Kinyonyoa nu Tumpu. Koanu hi’ binee’anNyo kamampuan da mompokapotakon Lele Ma’ima’. Saga’at mule’ na timbali hi’ montu’a-tu’anyoi molaya’ jema’at, saga’at na binee’anNyo kamampuan da timbali topopotingaan Sisik u Tumpu hi jema’at. 12 Tempo’nyo kita mokalajaa i pelayananto samian toka samian, na Nubau hi’ nu Tumpu sumo atu da mompakapokododo ahi’ iwi-iwi’ na anu mompolinganga’ anu tinimbalimo hi’ ngangahanan nu butong i Kristus. BinauNyo hi’ sumo atu da momposampa’ ahi’ mianNyo da timbali hi’ montoluk kalajaa nu pelayanan anu mokopodensu’ butong i Kristus.
13 Tujuannyo da kita iwi-iwi’ na tahuu hi’ madodo ka’ mosa’angu’ na montaha’imani tiba pokakana ahi’ na pontutuginto bau-baunyo nu Anak nu Anu Nonsihang. Atu mule’ da kita ko tu’a-tu’anyo ahi’ da sampa’ ahi’ ka’ montiho i Kristus. 14 Ingkop de opakento na kamampuan anu lengkat i Kinyonyoa nu Tumpu, na kita misa’ hi’ dai’ susumo to hiko-hiko’ anu malia’ nupiulu’i nu ajaran anu madi’ totu’u, susumo duangan anu ite’ kijo’ i pohintonga’an nu ambai malia’ ahi’ tongko’ nu tantunu nu bokon ka’ baleba’. Sumo hi’ atu na kantumuu’an nu mian anu nupiulu’i nu mian ma’idek tempo’nyo aha mompotingaan mian da’isan, de la mohongo ajaran nu aha na poto’i hi’ totu’u padahaan madi’ ahi’.
15-16 Ingkop de opokakanaakon i butong nu kita mian, na maka’ i Kristus ahi’ na Ubak, kita na butongNyo ahi’. Ingkop iwi-iwi’ na ngangahanan nu butong na tinasusun ahi’ ma’ima-ima’ ka’ mosumpak ahi’ i losuan. Maka’ de oboamo ingahanan nu butong, nutoluk ahi’ na kalajaanyo, sonto’nyo i lima nutoluk ahi’ na kalajaanyo, tengke mule’ sumo hi’ atumo opake hi’ lumajang, na maka’ ma’ima’ ahi’ tongko’, iwi-iwi’ na butongto modensu’ ahi’ ma’ima-ima’ ka’ tahuu hi’ mahoson. Ingkop de sumo atu, na tio hi’ kita modensu’ i ajaran anu totu’u ka’ saja’ hi’ maingkali-kalibosian. Pasasawe’nyo piin tiba piin na kita montiho ahi’ i Kristus, aitu Ubakto. De toka hi kita samian toka samian mokalajaa sesuai kamampuan anu binee’ nu Tumpu hi kita ka’ maingkali-kalibosian, na maka’ kita iwi-iwi’ na timbalimo hi’ madodo hi Tumpu.

Bauon nu mian anu mombatuk i Kristus

17 Maka’ Tumpu ahi’ na nompokuasa mae aku, mokonyo’ kusisik ka’ kuteteng hi komiu, da boli hi’ komiu tumuu’ susumo mian anu ma’isa monsumbu’ Tumpu. Bauon nu aha na ma’idek ahi’, ingkop atu komiu na boli hi’ pokakana aha, maka’ aha na lahi’ montutugi anu madi’ ko kaliangannyo.
18 Pontutugi nu aha na pinikato ahi’. Aha na gagahon ahi’. Maka’ madi’ hi’ monsumbu’ bau-baunyo nu Anu Nonsihang. Mokonyo’ atu madi’ hi’ aha monta’up kantumuu’an anu binee’ nu Anu Nonsihang. 19 Aha na madi’o hi’ ko pou’nyo tiba ambang madi’o hi’ dai’ osumbu-sumbu’, loloi’nyo lewa’o hi’ aha mombau ma’ide-idek, susumo atu monsaihoyo-hoyot boune sansamianan, kabai mo’ane sansamianan, mombau bodo-bodo’ ka’ mindede-dedeng, tiba mongindii anu nu samian, aitu ahi’ na anu lewa’ ubau nu aha.
20 Panyo bauon i Kristus anu toho’ ilioan miu tiba anu sinumbu’ miu na misa’ hi’ ko sumo atu. 21 Maka’ toho’o hi’ ihongo miu na bau-baunyo nu i Kristus. Ingkop atu kita mian anu mombatuk Ia, na polo’o hi’ pinotingaan na sipat nu Anu Nonsihang anu kijo’ hi Yesus. 22 Ingkop komiu na pinotingaano ahi’ da otibahakon ahi’ na bauon nu kantumuu’an anu piniino. Maka’ kantumuu’an anu piniino na lahi’ mombatuki pongka’oho’ nu kinyonyoa salapis, kopipiinnyo na ko ide-ideknyomo ahi’, susumo i baju’ anu mahude mogea-geato ahi’, madi’o hi’ timbali opake, otibahakono ahi’. Ingkop balu-balu’nyo baju’ anu mahude lahi’ otibahakon, sumo atu mule’ bauon nu kantumuu’anto anu piniino na lahi’ otibahakon. 23 Komiu na singkonamo hi’ pinotingaan da kinyonyoa tiba pontutugi miu na Nubali’i ahi’ nu Kinyonyoa nu Tumpu. 24 Susumo hi’ komiu mompusok baju’ anu bu’ou, sumo hi’ atu na kantumuu’an miu timbali hi’ bu’ou. Maka’ komiu pinotimbaliNyomo hi’ manusia bu’ou da balu-balu’nyo toaan, komiu na timbali hi’ pontoaan nu mian, aitu sipat nu Anu Nonsihang. Maka’ de obau miu sumo atu na komiu totu-totu’u hi’ molonde’ na tumuu’ ka’ mompahasintoka ahi’ ka’ Tumpu.
25 Ingkop atu kalana tibahakono ahi’ miu na bauon nu manusia anu piniino, na loloi’nyo boli hi’ komiu mombaleko’i samian. De basisik na basisik ahi’ anu totu’u hi samian, maka’ kita na bubuu’ ahi’ ngahanan nu sa’angu’ na butong, aitu butong i Kristus. 26 De alimu’nyo komiu pusa, boli ahi’ opobakas miu na pusa aitu monsaduakon komiu da baladosa’. Boli hi’ komiu pusa sansi-sansina. 27 Ka’ boli hi’ obee’i kasempatan na Lusupen mompokalah komiu.
28 De uka mae komiu mongkaima’ i montomang, obunsang uka na otibahakon ahi’ na montomang. Memule’ montomang, na sahanyo hi’ opake na limaum mokalajaa da polio doi da timbali opake miu pongoli kapalaluan miu, saga’at mule’ na timbali hi’ obagi hi mian anu ka’alusan kabai anu kasiasi.
29 Tempo’nyo komiu basisik, na boli hi’ montaloakon potatae anu koton lengkat i nganga’um, kabai potatae anu mongedei kinyonyoa nu mian saga’at. Panyo motatae ahi’ anu ma’ima’ da timbali hi’ ko kakonaannyo montulungi mian ka’ mompakapokododo kinyonyoa nu samian, ka’ momboa hi’ kaima’an hi mian anu buu’ mohongo potatae miu.
30 Sa’angu’ mule’ da bauon miu na boli hi’ mongedei Kinyonyoa Nu Tumpu. Maka’ susumo bundak, komiu na binundakNyomo ahi’ nu Kinyonyoa Nu Tumpu, ponsumbu’an komiu na tinimbalimo hi’ mianNyo, Ia ahi’ na montumpui komiu. Ingkop Kinyonyoa ahi’ nu Tumpu na bau jaminan kakopiananto tempo’nyo kita nupolapas ahi’ lengkat i aya i dunia anu pikat.
31 Ingkop otibahakon ahi’ iwi-iwi’ na aitu monsainguna’ i kinyonyoa potatae tiba bauon anu ma’idek susumo atu mompoinau’akon, ka’ mongkapusai mian. Boli hi’ mahantuda’ ka’ molobisa’ hi samian. Tiba boli hi’ ko kinyonyoa mongkaideki mian tiba kinyonyoa saga’at anu ma’idek.
32 Ingkop komiu na tionyo hi’ saja’ ma’ima’ na kinyonyoa, maingkali-kalibosian, ka’ mongampuni kasala’an nu mian, susumo hi’ Anu Nonsihang nongampuniakon kita kalana anu binau i Kristus hi kita, uka Ia sinilaka i kau’ salip.

5

Komiu tionyo hi’ tumuu’ i uno nu liana

1 Maka’ komiu na to ana-anak ahi’ nu Anu Nonsihang anu tahuu kinalibosanNyo mae, mokonyo’ atu komiu tiohi’ balausaha da mombatuk ahi’ tuladan nu Anu Nonsihang. 2 Okalibosi ahi’ na samian toka samian susumo i Kristus nongkalibosi mae kita. Ia nombee’ mae posi butongNyo binau hana’u hi Anu Nonsihang da nongkopianakon kita. Ingkop anu binau i Kristus, atu na tinimbali hana’u anu ma’ima’ na nohongnyo, ka’ monsongka’ kinyonyoa nu Anu Nonsihang.
3 Komiu na mianNyo ahi’. Mokonyo’ atu bauon anu ma’ide-idek susumo atu monsaihoyo-hoyot boune sansamianan kabai mo’ane sansamianan, mombau bodo-bodo’ ka’ mindede-dedeng, mongindii anu nu samian na boli ahi’ obau miu, maka’ madi’ toho’, la pe’e osisik miu madi’ hi’ ko timbali, maka’ komiu na tinimbalimo hi’ mian bu’ou. 4 Sumo atu mule’ potatae miu, boli ahi’ motatae anu ma’idek, anu koton ka’ anu madi’ ko kakonaannyo. Maka’ anu susumo atu na madi’ hi’ pantas toka hi komiu. Panyo hi komiu na saja’ ahi’ tolotalimakase hi Tumpu.
5 Ingkop opalahatikan ahi’ ma’ima-ima’: mian anu saja’ mongindii anu nu samian konyo’ pe’e anungku, na pokakana ahi’ mian anu dai’ monsangke anu i pikat. Tiba mule’ aitu mian anu mombau bodo-bodo’ ka’ monsainghoyo-hoyot boune ka’ mo’ane sansamianan, ka’ mindede-dedeng na madi’ hi’ timbali mianNyo anu nutu’a-tu’anyoi i Kristus ka’ Anu Nonsihang.
6 Boli hi’ komiu nupiulu’i nu sisik u mian anu madi’ ko kakonaannyo. Maka’ to mia-mian anu mombau susumo anu sinisikku nautu na mokopusa ahi’ Anu Nonsihang, maka’ madi’ hi’ aha matialuk hi Ia. 7 Ingkop atu na mokonyo’ toka hi komiu na boli hi’ lako’ monsangalu tiba aha.
8 Maka’ totu’u ahi’ uka mae komiu tinumuu’ na pikat ahi’, panyo sumo uka manau’ komiu tinimbalimo mianNyo, na komiu tumuu’o ahi’ i liana. Mokonyo’ atu bauon miu na tiohi’ pokakana mian anu tumuu’ i liana. 9 Kalana liana na lahi’ mimbua’ kaima’an, ka’ anu adin, ka’ anu totu’u. 10 Ingkop toka hi komiu na balausaha ahi’ na molio jalan da osumbu’ ahi’ na anu timbali monsongka’ Tumpu.
11 Bolimo hi’ komiu montoluk bauon anu madi’ ko kakonaannyo, susumo anu nubau nu mian anu dai’ tumuu’ i pikat. Panyo opotoa ahi’ na bauon ka’ potatae miu anu ma’ima’ hi aha, da sainsumbu’ ahi’ hi aha na talu’ bauon nu aha na sala’ ahi’ . 12 Maka’ susumo atu anu nubau nu aha i tampat anu madi’ nutoa nu mian saga’at na tahuu hi’ mokoambang, maka’ la pe’e obisalakon na mokopa’ambang ahi’ . 13 Panyo manau nujingkaimo nu liana, aitu ajaran anu totu’u lengkat i Anu Nonsihang, na iwi-iwi’ nutoamo ahi’ nu mian mali-malingkoyaa na bauon nu aha sala’ ahi’. Maka’ iwi-iwi’ na bauon anu ma’idek na nutoa ahi’ mali-malingkoyaa tempo’nyo nujingkai nu liana. 14 Aitu na mokonyo’ sinisik,
“Komiu anu dai’ hoyot tongoa’o ahi’!
Komiu mule’ anu sinilakamo pobulaamo ahi’ ka’ poule’ tumuu’.
Maka’ i Kristus na balu-balu’nyo ahi’ batu nu sina, monjingkai komiu.”
15 Ingkop da saja’ ahi’ osohop na butong miu. Da osuak ahi’ miu na bau-baunyo nu monjalanakon, boli hi’ potun. 16 Toka minsan de ko kasempatan mombau ma’ima-ima’, na saja’ hi’ obau. Maka’ kita mian tempo’ aya na bibii hi’ mombau ma’ide-idek hi samian. 17 Mokonyo’ atu toka hi komiu na boli hi’ potun, lahi’ saja’ opopaku’akon na anu Nukahanda’i nu Tumpu hi kita, da osumbu’ ahi’ miu.
18 Tiba boli hi’ komiu lewa’ ba’inum i anu mokopalangu, maka’ monsaduakon ahi’ komiu da ma’idek. Panyo da lahi’ komiu Nutu’a-tu’anyoi mae nu Kinyonyoa nu Tumpu.
19 Ingkop saja’ hi’ monyanyi mongunde’ Tumpu i uno nu kinyonyoa miu, ka’ maimpoko-pokododoan ka’ mailumu-lumuian nu lewa’ mongunde’ Anu Nonsihang — aitu nyanyian lengkat i Buuk nu Unde-unde’an, lengkat i Sisik u Tumpu, ka’ nyanyian anu Nupokau nu Kinyonyoa nu Tumpu. Sa’angu’ mule’, uka na saja’ ahi’ okakebuhakon na mongunde’ Tumpu. 20 Uka na komiu tionyo hi’ saja’ tolosalamat maka’ komiu ka’ Anu Nonsihang na i Yesuso ahi’ na nongkopianakon. Ingkop susumo atu anu ota’upto sansina-sina na okajama’akono ahi’ hi Anu Nonsihang, uka Tumanto.
21 Ingkop komiu moholomati i Kristus na matialuk ahi’ hi samian toka samian.

Langkai’ ka’ bengkele’

22 Ingkop toka atina’ hi komiu to bo-boune anu nosoamo na tiohi’ matialuk hi langkai’ miu. Maka’ de mintulu hi langkai’ na ponsisik komiu mintulu ahi’ hi Tumpu Yesus. 23 Maka’ langkai’ ahi’ na montu’a-tu’anyoi bengkele’, mololoi’akon ahi’ uka i Kristus na montu’a-tu’anyoi jema’at. Ingkop i Kristus ahi’ na nomposalamat mae jema’at, aitu butongNyo. 24 Ingkop jema’at na matialuk ahi’ hi Kristus, sumo atuje mule’ na bengkele’ tio hi’ matialuk hi langkai’. Maka’ ingko-ingkot osehaakon ahi’ hi langkai’.
25 Sumo atu mule’ langkai’, tio hi’ okalibosi na bengkele’ ka’ oisei, maka’ mololoi’akon ahi’ uka i Kristus nongkalibosi mae jema’at ka’ nombee’ posi butongNyo binau hana’u hi Tumpu, 26 da pinontohobiakonNyo anu binau anu ma’ide-idek. Maka’ oboamo i ue, kita na pinindi’o hi’ me i Yesus da kita mosipolonde’ ahi’ ka’ boli hi’ pokakana anu ma’isa mompolinganga’. Maka’ aya hi’ sisikNyo na susumo pinompindii’Nyo mae. Da susumo i ue, inganjuhakonnyomo ahi’ a kudun aya i butongto, maka’ aya hi’ sisikNyo na susumo i ue monganjuhakon. 27 Mokonyo’ binauNyo susumo atu da jema’at mosipalintade ahi’, boli hi’ koanu gagana’ opisala’i. Susumo i pengantin boune, ia mositingkai’on ahi’ tiba mosipolonde’. Tiba pe’e gagana’ koanu ma’idek a otoa susumo atu kumodukus na kilit madi’ ahi’. Da manau’ obaluko, posi Ia ahi’ a toka mae mongala bau susumo bengkele’Nyo.
28 Ingkop toka hi langkai’ na tio hi’ okalibosi na bengkele’ gampanyo hi’ mongkalibosi posi butong. Gampanyo hi’ lewa’ komiu mompalakai posi butong, atu na olalinakon hi bengkele’, opalakai ahi’. 29 Maka’ kita mian na tio hi’ opalakai na posi butong. Madi’ hi’ ko toho’ mian mongkaideki posi butong. Atu ha gampanyo Tumpu i Yesus ka’ jema’at. Tumpu pe’e be saja’ hi’ mompalakai mae jema’at, 30 maka’ kita na ngangahanan ahi’ nu butongNyo.
31 Koanu hi’ tinulis pe’e naipuan i Sisik u Tumpu konyo, “Mokonyo’ susumo atu mo’ane nupala’ii na kijo’ tu’anyonyo ka’ toka hi’ ia mosa’angu’ tiba bengkele’nyo, da misa’o hi’ dai’ ua aha, panyo lamo hi’ sa’angu’.” 32 Maka’ totu’u ahi’, ayat aya na mosa’angu’ hi’ madi’ opokosumbu’ u kita mian. Panyo alati’nyo nu anu kusisik uka, na aitu hi’ bau-baunyo nu hubungan i Kristus ka’ jema’atNyo. 33 Panyo ayat aitu na singkona hi’ ko hubungannyo tiba komiu: Maka’ susumo atu to langka-langkai’ na tiohi’ okalibosi na bengkele’, gampanyo hi’ mongkalibosi posi butong, atu na olalinakon hi bengkele’. Sumo atuje mule’ komiu to bengke-bengkele’ maka’ tio hi’ okaboati ka’ ohongo na langkai’.

6

To hiko-hiko’ tiba tuma ka’ tina

1 Ingkop toka atina’ hi komiu to hiko-hiko’, na matialuk ahi’ hi tu’anyo miu. Maka’ anu mompolinganga’ i Kristus na tio hi’ sumo atu na obau, matialuk ahi’ hi tu’anyonyo. 2 Maka’ palenta ahi’ lengkat hi Tumpu na monsisik konyo, “Oholomati ahi’ na tumaum ka’ tinaum.” Maka’ i atulan nu agama Yahudi na manjoo’ ahi’ na palenta, panyo aya ahi’ na palenta sasalataa anu mojajalan tiba tipo’ anu binee’ nu Tumpu (hi aha mianNyo) konyo, 3 “Da komiu tumuu’ ma’ima’ ka’ piin ahi’ na tumuu’ aya i dunia.”
4 Ingkop toka mule’ atina’ hi komiu to tu-tuma, boli hi’ lewa’ otawewai tiba motatae kasan hi aha to ana-anak maka’ pasasawe’nyo komiu mongedei ahi’ kinyonyoa nu aha. Opotuu’ ahi’ ka’ opangakui na kapalaluan nu aha, opokinde’i ka’ oalo tiba opokunaya na anak da aha tumuu’ mingatulan ka’ talatiip. Opotingaan ahi’ ka’ opokinde’ nu ajaran nu Tumpu.

To botu-botuan ka’ tu’a-tu’anyo

5 Ingkop toka mule’ atina’ hi komiu to botu-botuan, na tio hi’ matialuk hi tu’anyo miu anu montumpui komiu aya i dunia, boli hi’ la dai’ ko ahanyo atu ahu-ahum na komiu matialuk. Panyo matialuk ahi’ totu-totu’u susumo komiu matialuk hi Kristus. 6 Ingkop mokalajaa ahi’ (ma’ima-ima’) tempo’nyo komiu nutoa nu aha kabai imadi’. Boli hi’ la montutugi da mohumpak unde-unde’an nu mian. Mokalajaa ahi’ susumo botuan i Kristus anu mombatuk pongka’oho’ nu Anu Nonsihang, otoluk ahi’ tongko-tongko’ lengkat i kinyonyoa.
7 Kalajaa anu obau miu na tio hi’ otoluk nu kinyonyoa sanaang maka’ sabenanyo na komiu mokalajaa ahi’ hi Tumpu, misa’ ahi’ ko la to mianan. 8 Oinau’ ahi’ toka hi komiu, Tumpu ahi’ na mombee’ tamboonyo hi mian anu mokalajaa ma’ima-ima’ samian toka samian, maumo komiu botuan kabai misa’ ko botuan.
9 Ingkop toka mule’ atina’ hi komiu to tu’a-tu’anyo kabai bos, na tiohi’ mombau manono-nonong hi aha to botu-botuan miu. Boli hi’ komiu monggala-gala aha. Oinau’ ahi’, komiu tiba aha na pokakana ahi’ lahi’ sa’angu’ a tu’anyo, aitu Tumpu Anu kita’ mae i sulugaa’ Ia na madi’ hi’ ko toho’ monggihan.

Talakana’ u palaang nu mian anu mombatuk i Kristus

10 Ingkop kahimpungutannyo na kupoto’i ahi’ hi komiu to utu-utus, da madodo ahi’ hi Tumpu, maka’ komiu nosa’angu’o ahi’ tiba i Yesus ka’ saja’ hi’ toseha i kuasaNyo.
11 Oboamo susumo i tantada aha mompake talakana’ nu palaang, sumo atu je mule’ na komiu, tio hi’ opusok iwi-iwi’ na talakana’ nu palaang anu binee’ nu Anu Nonsihang, da opokoala hi’ miu na molawan piulu’ i Lusupen. 12 Maka’ anu olawanto na misa’ hi’ ko to mianan anu aya i dunia, panyo molawan ahi’ to se-setan ka’ molawan iwi-iwi’ na kuasa anu montu’a-tu’anyoi to se-setan. Maka’ sumo uka na aha ahi’ na mongkuasai aya dunia anu pikat tiba anu ata’ i langaa. 13 Ingkop atu na mokonyo’ palalu hi’ komiu mompusok iwi-iwi’ na talakana’ nu palaang lengkat hi Tumpu, da tempo’nyo toka mae komiu nu tatumbuhi nu musu’, na opokoala ahi’ miu na molawan ka’ tataap ahi’ tuminjo mado-madodo lambaakonnyo mingkot na palaang.
14 Tinjohakon ahi’ ma’ima-ima’ ka’ otoongi ahi’ na ajaran anu totu’u anu lengkat hi Anu Nonsihang. Maka’ ajaran aitu na balu-balu’nyo ahi’ nu baan pombutu’ koja da komiu siap ahi’ na montoluk pa’ apa utu na anu okalajaa.
Ingkop atu da toka hi komiu na saja’ ahi’ oinau’, komiu na siniho’o hi’ nu Anu Nonsihang mian hondo, kalana nosa’angu’o ahi’ i Kristus Yesus. Maka’ de komiu tinaha’imano susumo atu, na balu-balu’nyo hi’ komiu nompusoko ahi’ baju’ besak anu monjagai butong miu.
15 Saja’ ahi’ opake na sapatu, aitu londos na monsisikakon Lele Ma’ima’, maka’ Lele Ma’ima’ aitu, na mokopa’ima’ komiu ka’ madi’ koanu okasusa’akon.
16 Sa’angu’ mule’, tataap ahi’ taha’iman hi Tumpu Yesus. Maka’ aitu taha’iman, na balu-balu’ ahi’ nu kanta pompedas, ka’ timbali hi’ mompoho’ iwi-iwi’ na pana’ lengkat i Lusupen anu ko ko apunyo.
17 Saja’ ahi’ otuka’ i posi kinyonyoa miu, komiu na kinopianakono ahi’ nu Anu Nonsihang, maka’ de saja’ montuka’ aitu kakopianan, na balu-balu’nyo hi’ nu songko’ nu tantada.
Ka’ otoongi ahi’ na sisik u Tumpu, maka’ sisik u Tumpu na bajak ahi’ nu Kinyonyoa nu Tumpu.
18 Obau ahi’ iwi-iwi’ na aitu ka’ saja’ hi’ momoitatulung hi Tumpu ka’ toka hi’ minsan tempo’nyo komiu balado’a na komiu nu tu’a-tu’anyoi ahi’ nu Kinyonyoa nu Tumpu. Balado’a ahi’ mau tempo’ u sanaang kabai susa’. Apa na anu opalalu na osehakon ahi’ iwi-iwi’ i kuasa nu Kinyonyoa nu Tumpu. Ingkop toka hi komiu na saja’ ahi’ sumohop ka’ boli hi’ tolosule’. Toka hi’ minsan balado’a, saja’ hi’ odo’aakon iwi-iwi’ na mian nu Anu Nonsihang.
19 Aku mule’ na singkona hi’ odo’aakon mae da tempo’nyo aku basisik hi mian, Nubalakati hi’ mae nu Anu Nonsihang da monsuak pasasawe’nyo aku timbali hi’ baani na basisik tempo’nyo monsisikakon Lele Ma’ima’ anu uka pe’e mae dai’ biniNyo.
20 Maka’ aku na anu hi’ pinokau nu Anu Nonsihang da monsisikakon Lele Ma’ima’, atu na mokonyo’ sumo uka aku tinalungku’ ka’ pinungu nu lante’ besak. Panyo do’aakon ahi’ da aku baani ahi’ na monsisikakon Lele Ma’ima’ lengkat hi Tumpu, maka’ aitumo ahi’ na kalajaa anu binee’Nyo mae hiyau’.

Kinapupusan nu sulat i Paulus

21-22 Ingkop i Tikhikus anu hi’ kukalibosi, na momboa sulat aya moitina’ hi komiu. Ia na utusto ahi’ maka’ nosa’angu’o ahi’ i Yesus, ka’ anu hi’ tatap ka’ mokalajaa ma’ima-ima’ hi Tumpu. Ingkop sinaingku ahi’ na ia moitina’ hi komiu da ia na toka monsisikakon bau-baunyo nu kantumuu’anku ka’ kalajaangku sumo uka, da komiu timbali hi’ monsumbu’ anu tina’up mami sumo uka da ia timbali hi’ mompakapokododo ka’ molumui kinyonyoa miu.
23 To utu-utus, aku balado’a da bisa-bisa’ ahi’ Anu Nonsihang Tumanto ka’ i Yesus Kristus na saja’ mompokododo komiu taha’iman hi Ia, da komiu saja’ maingkali-kalibosian, ka’ Ia ahi’ na monjagai komiu da kantumuu’an miu saja’ hi’ ma’ima’ ka’ madi’ koanu okasusa’akon.
24 Bisa-bisa’ ahi’ Anu Nonsihang na mombalakaati kita iwi-iwi’ anu saja’ mongkalibosi Tumpunto i Yesus Kristus lambaakonnyo. Lahi’ sumo atu na sulatku. Paulus.