Filipi
1
Sulat i Paulus anu pinakatunyo hi jema’at u Filipi
1 Sulat aya lengkat hiyau’ i Paulus tiba i Timotius anu montolukakon kalajaa i Kristus Yesus. Toka hi komiu sangalu batu-batu anu jojoong i kota’ u Filipi anu molonde’ maka’ nosa’angu’o ka’ i Kristus Yesus, tiba mule’ itina’ komiu to pena-penatua tiba mule’ diaken.
2 Ingkop uka opoitaakon ahi’ mami, da bisa-bisa’ ahi’ saja’ ahi’ komiu tenaang ka’ libosNyo ahi’ anu la tutuk binee’Nyomo mae nu Anu Nonsihang Tumanto tiba Tumpunto i Yesus Kristus na monsangalui komiu.
Bau-baunyo nu i Paulus nomoitaakon hi Anu Nonsihang jema’at
3 Maka’ toka hi’ minsan aku tolosukap hi komiu saja’ ahi’ aku majama’ hi Anu Nonsihang. 4 Tiba mule’ toka hi’ minsan aku momoitaakon komiu iwi-iwi’, saja’ ahi’ majama’ na kinyonyoangku. 5 Mokonyo’ aku majama’ ahi’ hi Anu Nonsihang, maka’ lengkat pe’e ahi’ salataa komiu nompolinganga’ lambaakonnyo sumo uka, saja’ ahi’ mae komiu nompaha sangaja’akon aku nonsisikakon hi mian, Lele Ma’ima’.
6 Ingkop toka hiyau’ na madi’ ahi’ ko gagana’ aku mohua’, na Anu hi’ Nonsihang na nontampu’uni kalajaa anu ma’ima’ atina’ mae hi komiu. Ingkop toka hiyau’ na madi’ ahi’ ko gagana’ aku mohua’ tio-tio hi’ saja’ ubau nu Anu Nonsihang lambaakonnyo selesai saidi’ mae poule’ Ia toka na i Kristus Yesus.
7 Ingkop atu na konanyomo ahi’ na aku montutugi susumo atu atina’ mae komiu, maka’ komiu na ukamo hi’ i kinyonyoangku, maka’ komiu singkonamo hi’ nonta’up bagian nu uka libosNyo anu la tutuk binee’Nyomo mae hiyau’. Naumo tempo’nyo aku aya i talungku’an, naumo na tempo’nyo lewa’ aku nontinjohakon ka’ mompokododo Lele Ma’ima’, komiu singkonamo hi’ nonta’up bagian nu uka libosNyo.
8 Maka’ Anu hi’ Nonsihang na monsumbu’ mae uka anu sinisikku, totu-totu’u ahi’ na aku mongkalibosi ka’ liing ahi’ hi komiu, aku mongkalibosi mule’ atu na lengkat ahi’ ilibos i Kristus Yesus.
9 Ingkop uka kupoitakon ahi’ hi Anu Nonsihang, bisa-bisa’ ahi’ da komiu mompaka ko bababihingnyo ahi’ na mongkalibosi Anu Nonsihang tiba mule’ komiu, samian toka samian, da pasasawe’nyo komiu monsuak ahi’ ka’ osumbu’ miu na montu’osi anu totu’u ka’ anu madi’. 10 Toka atu na osumbu’ ahi’ miu na mompile’i anu ma’ima’ na anu lako’ obau, molonde’ ahi’ na kantumuu’an miu lambaakonnyo saidi’ mae poule’ toka na i Kristus. 11 Iwi-iwi’ na anu lako’ obau miu ma’ima’ ahi’ totu-totu’u, maka’ lahi’ i Yesus Kristus da opoko toluk miu iwi-iwi’ na aitu, da toka hi mian aha mompopotangkas ahi’ ka’ mongunde’ Anu Nonsihang na montoa bauon miu ma’ima’.
Kesaksian i Paulus kijo’ i talungku’an
12 Maka’ kahanda’ku da toka hi komiu malingkoyaa ahi’ na aya anu tina’upku, lahi’ da noko ko da’i-da’isannyo mian anu nohongo ka’ nompolinganga’ uka Lele Ma’ima’. 13 Pasasawe’nyo na iwi-iwi’ na tantada anu monjagai kijo’ i laigan nu tomundo’ tiba mian saga’at anu i kota’ aya, na nalingkoyaa ahi’ lahi’ kalana aku mokalajaa hi Kristus na mokonyo’ aku tinalungku’ susumo aya.
14 Ka’ dina’isan ahi’ na mian anu mompolinganga’ i kota’ aya, nompaka padodo na montaha’imani Tumpu, na aya aku tinalungku’, pasasawe’nyo aha nompaka babihingo ahi’ na nonsisikakon Sisik u Tumpu hi sangalu, madi’o hi’ aha natakut.
15 Panyo ko mian ahi’ saga’at anu mompolinganga’ singkona monsisikakon bau-baunyo nu i Kristus, maka’ miluu uka i anu lewa’ binaungku ka’ lewa’ ahi’ mahansega mian saga’at, panyo ko mian ahi’ saga’at na anu hi’ totonggon ma’ima’ ahi’ na montutugi na monsisikakon hi mian bau-baunyo nu i Kristus. 16 Ingkop aitu aha, na mokonyo’ aha ma’ima’ ahi’ na montutugi na monsisikakon bau-baunyo nu i Kristus maka’ kijo’ ahi’ kinyonyoa mongkalibosi ahi’ Anu Nonsihang tiba aku, maka’ sinumbu’nyo ahi’ Anu hi’ Nonsihang na nompokau mae aku da montinjohakon, aitu Lele Ma’ima’. 17 Kijo’ mule’ aha saga’at na maka’ aha monsisikakon bau-baunyo nu i Kristus na misa’ ahi’ ko totonggon kinyonyoanyo londos, lahi’ kalana aha montutugi kapalaluan nu posi butongnyo. Kinyonyoa nu aha, obau sumo atu da aku mompaka susa’ aya i talungku’an.
18 Panyo ka’ atu na pobakas ahi’ maka’ naumo pe’e pa’ apaa na nututugi nu aha, maka’ posi aku na tataap ahi’ aku majama’ asan uka bau-baunyo nu i Kristus tataap ahi’ osisikakon. Na aku na sanaang ahi’.
19 Maka’ kusumbu’ ahi’ uka na lewa’ ahi’ mae komiu nomoitaakon aku, tiba Kinyonyoa ahi’ i Yesus Kristus na montulungi mae, da timbali aku nupolapas mae nu aha anu nontalungku’ mae aku, lengkat aya i talungku’an.
20 Maka’ anu tahuu tongko’ kupai indi-indii ahi’ ka’ kukonyo’ pe’e, na aitu hi’ da boli hi’ mopoho’ na kalajaa uka anu lewa’ kubau, da aku tumuu’ naumo na aku silaka, be tataap ahi’ saja’ bau balakaat toka hi sangalu da aha mompopodaka’ ahi’ i Kristus. 21 Maka’ de aku na aku tumuu’ lahi’ sa-sa’angu’ mokalajaa hi Kristus, aku silaka maka’ lahi’ da mompaka podensu’ na aya Lele Ma’ima’. Ingkop aku silaka na ka’untungan ahi’.
22 Panyo de dai’ aku tumuu’ na dai’ ahi’ aku mompaka tuusakon kalajaa nu Tumpu. Ingkop atu na madi’ ahi’ ko kusumbu-sumbu’ na mompile’i pa’ tataap tumuu’ na ma’ima’ kabai na silaka. 23 Maka’ oboamo i lima aya mae sambiha’ tiba sambiha’ bubuu’ mae koanu mohambet. Ingkop de la posi kahanda’ku na konyo’ pe’e hi’ kupala’iimo na aya dunia da tokamo hi’ monsainjojo-jojoong i Kristus, atu ahi’ na tahuu ma’ima’ toka hiyau’. 24 Panyo kaima’annyo na dai’ aku tumuu’ aya i dunia, na maka’ aku montulungi ahi’ komiu.
25 Ingkop malingkoyaa ahi’ tongko’ toka hiyau’ na aitu. Aitu na mokonyo’ toka hiyau’ tataap ahi’ aku jojoong atina’ hi komiu iwi-iwi’, da montulungi hi’ komiu da toka hi komiu timbali hi’ mompaka kopado-padodonyo ka’ mompaka pajama’ na montaha’imani Tumpu, 26 da manau’ poule’o aku minsusule’ moitina’ hi komiu, na komiu mompaka babihing ahi’ na mongkajama’i i Kristus Yesus.
Pokinde’ i Paulus hi mian nu Filipi anu mompolinganga’ da tataap ahi’ mongkakebuhakon mosa’angu’ hi Kristus ka’ monsisikakon sisikNyo
27 Ingkop anu palalu tongko’ toka hi komiu susumo uka, na aitu hi’ kantumuu’an miu na anu hi’ pokakana uka i Lele Ma’ima’, aitu bau-baunyo nu i Kristus. Da naumo dai’ aku mompahakabot komiu kabai na madi’o, sainsumbu’ ahi’ hiyau’ na komiu madodo ahi’ ka’ mosa’angu’ ka’ bubuu’ ahi’ mongkakebuhakon. Mongkakebuhakon mule’ atu na lahi’ sa-sa’angu’ na anu okahanda’i, aitu taha’iman anu pokakana Lele Ma’ima’ aitu anu lengkat hi Anu Nonsihang. 28 Ingkop toka atina’ hi komiu, na boli hi’ matakut hi aha anu mongkaima’i lewa’ mombau ma’ide-idek hi komiu, okabaaniakon ahi’ na hi komiu, da toka hi aha sainsumbu’ ahi’ madi’ ahi’ ko nupoko buhuki nu aha, komiu ahi’ na menaang, maka’ komiu na tuminjo ahi’ hi Anu Nonsihang.
29 Maka’ komiu binalakaatan nu Anu Nonsihang na misa’ ahi’ ko la da taha’iman hi Kristus sumo atumo, tiba hi’ monsabilakon lusa’ na mombatuk Ia. 30 Maka’ uka na atina’ pe’e mae komiu be pokakana ahi’ aya aku singkona hi’ mongkakebuhakon aitu Lele Ma’ima’, susumo uka anu toho’ tinoa miu kinakebuhakonku uka mae, ingkop atu na tataap ahi’ ohongo miu mae susumo uka na bau-baunyo nu aya aku.
2
I Paulus nompokinde’ da mosa’angu’ ahi’ ka’ matialuk susumo i Kristus
1 Maka’ atina’ komiu na sa-sa’angu’o ahi’ ka’ i Kristus. Ingkop atu ahi’ na mompokohoson komiu. Maka’ i Kristus na mongkalibosi hi’ komiu, atu ahi’ na molumui kinyonyoa miu, tiba mule’ Kinyonyoa nu Tumpu natiusoko ahi’ atina’ hi komiu. Atu ahi’ na mokonyo’ opokoala miu na manonong tiba maingkali-kalibosian samian toka samian.
2 Ingkop uka kupoita ahi’ hi komiu da toka hi komiu na osongka’ ahi’ mae na kinyonyoangku, da toka hiyau’ aku majama’ ahi’ totu-totu’u. Anu moko pajama’ mule’ aku na toka atina’ hi komiu na mosa’angu’ ahi’ na anu otutugi ka’ maingkali-kalibosian samian toka samian, maka’ aitu ahi’ maingkali-kalibosian na momposa’angu’ komiu ka’ oposa’angu’ ahi’ na anu otutugi tiba anu lako’ obau.
3 Ka’ boli hi’ la anu otutugi ko ka’untungan nu posi butong atu na obau, kabai na montutugi da pongalapan unde-unde’an. Panyo aitu hi’ matialuk samian toka samian na obau toka hi komiu, ka’ boli hi’ la montutugi da butong pe’e na tahuu opopohimona.
4 Oinau’ ahi’ na kijo’ anu nupalalu nu mian saga’at, boli hi’ la saja’ montutugi anu opalalu nu posi butong.
5 Toka atina’ hi komiu na anu otutugi na pokakana ahi’ sipat i Kristus Yesus. 6 Anu hi’ tou-touka pokakana Anu Nonsihang, panyo naumo na sumo atu, be madi’ ahi’ ko Ia pagala mompoago tio-tio pagala otoongi. 7 Maka’ tinoka hi Ia na posi kalondosanNyo ahi’ na Ia nontibahakon aitu iwi-iwi’ ka’ Ia pinohampe ahi’ nu mian Ia noko timbali mian, tinimbalimo hi’ gampanyo botuan. 8 Ingkop uka hi’ toka mae Ia tinimbali manusia, na Ia nintulu ka’ nombatuki pongka’oho’ nu Anu Nonsihang lambaakonnyo Ia pinosula i kau’ salip ka’ sinilaka.
9 Atu na mokonyo’ Ia na tahuu pinotangkas nu Anu Nonsihang ka’ binee’Nyo hi Ia na kuasa anu mosipatangkas, da iwi-iwi’ Iamo ahi’ na tahuu mosi patangkas ka’ kuasa saga’at. 10 Ingkop Ia pinopotangkasNyo, da iwi-iwi’ na anu tumuu’ na anu kita’ mae i langit tiba anu aya i dunia buu’ ahi’ monsangke i Yesus. 11 Ingkop buu’ ahi’ mompototu’u i Yesus Kristus na Tumpu, pasasawe’nyo na mompopodaka’ ahi’ Anu Nonsihang uka Tuma.
Jingkahahakan ahi’ sumo jingkahang anu monjingkai aya dunia
12 Ingkop toka atina’ hi komiu to utu-utus anu kukalibosi, uka tempo’nyo aku dai’ atina’ mae hi komiu, na komiu natialuk ahi’ uka i ajaran anu pinotingaanku hi komiu. Ingkop uka na naumo pe’e aku madi’ tua-tuang atina’ mae hi komiu, be tataap ahi’ otoluk miu na aitu. Kaliangannyo kantumuu’an miu na kantumuu’an ahi’ nu anu nompolinganga’o Anu Nonsihang, moholomati ahi’ ka’ matakut hi Ia.
13 Maka’ posi Anu hi’ Nonsihang na mokalajaa atina’ i kinyonyoa miu, da komiu londos ahi’ ka’ opokoala miu na montoluk kalajaa anu pokakana pongka’oho’Nyo.
14 Susumo mule’ atu lako’ komiu mokalajaa, na maka’ apaa na kalajaa anu lako’ obau miu na madi’ ahi’ ko timbali na soo’ lewa’ mo’oaluan ka’ mahansega samian toka samian. 15-16 Obau hi’ sumo atu da oboamo susumo i koton, komiu molonde’ ahi’ boli hi’ koanu opisala’i, da komiu tumuu’ aya i dunia na boli hi’ pokakana aha anu lewa’ mombau ma’ide-idek susumo uka, komiu mosi palintade ahi’ mosi pa’ima’. Maka’ atina’ komiu na anak ahi’ nu Anu Nonsihang, da manau’ komiu monsisikakono Lele Ma’ima’ anu moko tumuu’, na oboamo i jingkahang ia jingkahahakan ahi’ susumo ata’ to manda-mandala’ ka’ monjingkai mae aya dunia.
Maka’ de sumo hi’ atu na kantumuu’an miu, na saidi’an mae imihi poule’o Ia toka na i Yesus Kristus, atu ahi’ na moko pajama’ aku tiba bangga’ na motutugi komiu, maka’ atu ahi’ na ponsumbu’an anu lewa’ binaungku nongkakebuhakon, madi’ ahi’ ko la na’anju i ue, anu lewa’ kinakebuhakonku na kino hasingnyo ahi’.
17 Ingkop uka na de alimu’nyo aku nu patei mae nu mian ka’ opojuju na baso’ku bau susumo hana’u obee’ hi Anu Nonsihang, da komiu na mompaka taha’iman ka’ majama’ hi Ia. Na singkona hi’ aku majama’ gampanyo komiu. 18 Ingkop atu na naumo aku silaka, komiu na ko halusnyo ahi’ singkona majama’ gampanyo aya aku.
Bau-baunyo nu i Timotius
19 Maka’ de posi hiyau’ na malingkoyaa ahi’ de i Tumpu Yesus na mombalakaati na uka hi’ lia-lia’ na aku monsai i Timotius moitina’ hi komiu, da komiu majama’ ahi’ na kinyonyoa na labot mohongo i Timotius monsisik hi komiu bau-baunyo nu aya aku ka’ manau’ ia minsusule’o mae, aku singkona hi’ majama’ na kinyonyoangku na labot mohongo bau-baunyo nu itina’ mae komiu.
20 Maka’ uka na mehi’ i Timotius na dai’ tongko-tongko’ mompahasangaja’akon aya aku monginau’ montulungi kapalaluan miu. 21 Sambiha’nyo na ia, na mehi’ buu’ daka’ i kalajaa nu posi butong, madi’o hi’ montutugi kalajaa i Yesus Kristus.
22 Maka’ komiu pe’e be monsumbu’o ahi’ totu-totu’u ahi’ ia nontulungi hi’ mae aku. Nalingkoyaamo hi’ hi komiu na bau-baunyo nu ia nompaha sangaja’akon mae aku, sumo hi’ balu-balu’ nu anak tiba tumanyo mokalajaa. Sumo hi’ atu na ia nompahasangaja’akon mae aku nongkakebuhakon nonsisikakon Lele Ma’ima’ anu lengkat hi Anu Nonsihang.
23 Ingkop aitu na mokonyo’ ia ahi’ na kusai moitina’ hi komiu uka lia-lia’, manau’ malingkoyaamo na anu kuta’up, pa’ aku nu nupolapas kabai na madi’. 24 Panyo ka’ malingkoyaa ahi’ hiyau’ Tumpu ahi’ na montulungi mae, da aku timbali hi’ moitina’ modumpak hi komiu uka lia-lia’.
Bau-baunyo nu i Paulus poule’ nonsai i Epafroditus i Filipi
25 Ingkop monsisik mule’ uka i Epafroditus uka anu sinai miu mae da toka mae monsampuusi aku, na pontutugingku uka na palalu hi’ poule’ kusai da minsusule’ moitina’ hi komiu. Maka’ ia na saja’ ahi’ mae nonsangalui aku, uka lewa’ aku nongkakebuhakon nokalajaa. 26 Maka’ uka na ia liingo ahi’ tongko’ hi komiu iwi-iwi’. Kinyonyoanyo pe’e susa’ ahi’ tongko’ na montutugi uka komiu nonsumbu’ mae ia mapalak.
27 Totu’u ahi’ ia napalak ahi’ tinahahumo koboli hi’ silakamo. Panyo dai’ ahi’ ia kinalibosan nu Anu Nonsihang ka’ pinololokNyo, tiba mule’ Ia mongkalibosi ahi’ mae aku. PinololokNyo ahi’ na i Epafroditus da boli hi’ mompaka pa’idek na kinyonyoangku. 28 Atu na mokonyo’ kinyonyoangku na uka hi’ lia-lia’ na aku monsai ia poule’ minsusule’ moitina’ hi komiu, da toka hi komiu manau’ mompahakaboto ka’ mompahatoa ia na komiu majama’ ahi’, kinyonyoangku mule’ na tenaango ahi’.
29 Ingkop labot ahi’ otalima okajama’i tongko-tongko’, maka’ ia na sa-sa’angu’ ahi’ anu singkona mompolinganga’ Tumpu. Ingkop toka hi komiu na oholomati ahi’ iwi-iwi’ na mian anu mokalajaa hi Tumpu susumo utu ia. 30 Maka’ aitu hi’ mokalajaa hi Kristus na uka ia nonsabilakon koboli ia silakamo. Atu mule’ anu binaunyo na iwi-iwi’ lahi’ sa-sa’angu’ ia nombutongakon komiu, toka mae montulungi aku mompaha sangaja’akon kalajaa i Kristus, maka’ aya hi’ kita to majo’onan.
3
Bau-baunyo nu Anu Nonsihang mompokoima’i hubunganto ka’ Ia
1 Ingkop uka sa’angu’ mule’ da toka itina’ hi komiu to utu-utus anu nompolinganga’o, na majama’ ahi’ maka’ pinosa’angu’o ahi’ ka’ Tumpu. Maka’ uka na madi’ ahi’ ko sala’nyo na poule’ ku’ulit na uka anu toho’o tinulisku noitina’ hi komiu uka mae, da toka hi komiu na saja’ ahi’ sumohop da komiu majo’on ahi’ i musu’ anu susumo uka lewa’ mompoinau’akon mae.
2 Opopo sohop ahi’ jumo toka mae komiu nupiulu’i nu aha anu lewa’ mombau ma’ide-idek. Maka’ aha na sumo hi’ pojek anu ma’uha, lewa’ ahi’ aha mompakisaa mokisunat.
3 Maka’ monsisik susumo atu sunat na sabenanyo, kita ahi’ na mian anu sinunat totu-totu’u, misa’ ahi’ ko aha. Susumo atu mule’ kita monsangke Anu Nonsihang na maka’ posi Kinyonyoa ahi’ nu Anu Nonsihang na monsampuusi mae. Ingkop kita na lahi’ majama’ maka’ kita na sa-sa’angu’o ahi’ ka’ i Kristus Yesus, kita na madi’o ahi’ mintoong i sunat na mongkopianakon mae kita.
4 Maka’ sabenanyo de la mompopodaka’ susumo to atu-atulannyo da mompahasintoka Anu Nonsihang, na maka’ aku pe’e be babihing ahi’ tongko’ na mombatuki atulan aitu. Ingkop de iyee na ko pontutugi aitu sunat na bau pintongan, na maka’ aku ahi’ na tahuu mongkakebuhakon ka’ mian ititina’, aku ahi’ na tahuu babihing na mombatuki. 5 Maka’ aku na salataa pe’e ihampe aku na mian ahi’ nu Israel, sinunat ahi’ tinoka ialun, lee’ ahi’ i Benyamin, mian ahi’ nu Ibrani totu-totu’u. Atu mule’ bau-baunyo nu mombatuki atulan nu agama nu Yahudi na maka’ aku na singkona hi’ Farisi. 6 Susumo mule’ atu anu mompolinganga’ i Yesus, aku na babihing ahi’ tongko’ na lako’ lewa’ molusa’ aha. Maka’ de susumo atu mombatuki atulan nu agama nu Yahudi, hiyau’ na binatukanku ahi’ ma’ima-ima’ madi’ ahi’ koanu sala’ santaa’ na binahakonku.
7 Panyo uka manau’ aku nompolinganga’o ka’ nombatuki i Kristus, na uka anu lewa’ pinopodaka’ku uka mae na sumo uka na madi’o hi’ ko angga’nyo toka hiyau’. 8 Atu pe’e na misa’ ahi’ ko la atu, na anu madi’ ahi’ ko tongko’ kino kali-kaliangannyo, iwi-iwi’ ahi’ na anu lewa’ pinopodaka’ku uka mae, uka na madi’o ahi’ ko angga’nyo na montutugimo uka manau’ nompolinganga’o i Kristus Yesus uka Tumpungku. Tinibahakonkumo ahi’ na anu lewa’ binaungku uka mae. Maka’ anu uka mae na susumo i amok, binataakonkumo ahi’ i batakonan amok, da i Kristus ahi’ na montumpui aku, 9 ka’ mosa’angu’o ahi’ totu-totu’u ka’ Ia. Ingkop aku kopian ka’ Anu Nonsihang na misa’o hi’ ko posi bauonku aitu mombatuki atulan nu agama, maka’ totonggon ahi’ Anu Nonsihang na nompopohondo mae. Ingkop aku nupopohondo mae nu Tumpu na pu’unyo na aitu hi’ mompolinganga’ i Kristus.
10 Ingkop uka na anu kukahanda’i na mehi’ sa-sa’angu’ da kusumbu’ ahi’ totu-totu’u na i Kristus ka’ singkona hi’ aku monta’up lusa’ uka anu tina’upNyo, da sumo hi’ Ia, i londos ahi’ na i lusa’ lambaakonnyo sinilaka. Loloi’nyo aku monta’up ahi’ kuasa nu Anu Nonsihang uka Ia nombulaakon i Kristus, atu ahi’ na anu kukahanda’i, 11 da posi Anumo hi’ Nonsihang na poule’ mompotumuu’ saidi’ mae aku moko silaka.
Okakebuhakon ahi’ da otokai ahi’ na anu okinyonyoai
12 Panyo uka kusisik susumo aya, na misa’ ahi’ ko patunyo pinoko tolukumo iwi-iwi’ na kalajaa nu Tumpu aku na sampa’o. Lahi’ hiyau’ na saja’ ahi’ kukakebuhakon da kutokai ahi’ na hadia anu pinoguhatakon i Yesus Kristus. Maka’ atu ahi’ na mokonyo’ aku ilagaNyo da Iamo ahi’ na montumpui mae aku.
13 Ingkop atu da toka hi komiu to utu-utus, malingkoyaa ahi’, hiyau’ pe’e na ma’isa hi’ ko pinoko tokaanku na aitu. Lahi’ maka’ anu kubau susumo uka, hiyau’ na tinibahakonkumo ahi’ na anu uka mae i hiku ka’ mehi’ mongkakebuhakon da otokai na anu aya mae oahopi. 14 Atu na mokonyo’ oboamo i maintangka’ mopalai, madi’ ahi’ ko soo’ aku tolotinjo, da otokai ahi’ na anu okinyonyoai, aku menaang ahi’ ka’ mohumpak ahi’ hadianyo. Hadia mule’ aitu na aitu hi’ kantumuu’an anu kita’ mae i sulugaa’ anu tinipo’akon nu Anu Nonsihang. Maka’ atu ahi’ na kakonaannyo nu kita i laga nu Anu Nonsihang, mokonyo’ kita i lagaNyo mae maka’ kita nosa’angu’o ahi’ ka’ i Kristus Yesus.
15 Ingkop atu da kita anu tu’amo i Sisik u Tumpu, na sumo hi’ atu na pontutugi. Panyo de alimu’nyo toka atina’ mae hi komiu dai’ koanu ma’isa montalima ajaran aya, na kupoitakon ahi’ hi Anu Nonsihang da Ia na mombalakaati, da timbali hi’ osumbu’ miu na montutugi anu totu’u.
16 Lahi’ uka na koanu hi’ palalu opalahatikan miu, da tataap ahi’ saja’ babihing na mombatuki ajaran anu lewa’ binatukanto lambaakonnyo susumo uka.
Pokinde’ i Paulus hi jema’at nu Filipi
17 Toka atina’ hi komiu to utu-utus na lahi’ aya aku na osonto’ miu mae, maka’ uka na pinotoamo hi’ mami hi komiu na sonto’ anu ma’ima’. Ingkop toka hi komiu opalahatikan ahi’ ka’ osonto’ na kijo’ aha anu mombatuki mae uka anu lewa’ pinotingaan mami.
18 Ingkop uka na poule’ ahi’ ku’ulitakon na uka anu toho’o lewa’ sinisikku hi komiu, aya mule’ aku poule’ monsisik, na aku loo’ ahi’ ka’ humaang, maka’ uka na da’isan ahi’ na mian mongkaideki kaliangannyo nu uka i Kristus pinosula ka’ sinilaka. 19 Lahi’ maka’ saidi’ mae na kantumuu’an nu mian anu susumo atu na mosa’angu’ hi’ ma’idek ka’ lusa’ saidi’ mae. Maka’ kikijo’o ahi’ anu nukahanda’i nu butong nu aha na saja’ upotuhu nu bau, atumo ahi’ na bau susumo tumpu nu aha. Maka’ sabenanyo moko ambang ahi’, toka hi aha na nupopodaka’ ahi’. Maka’ anu lewa’ nututugi nu aha na mehi’ anu aya ibuan nu tano’.
20 Panyo kita na boli hi’ maintiho hi aha, maka’ kita na mian ahi’ nu sulugaa’, maka’ lengkat ahi’ i sulugaa’ na uka Tomundo’ anu toka mae nolumpati kita uka i Yesus Kristus saidi’ mae poule’ Ia toka. Iamo ahi’ na anu saja’ opope’ainto ka’ okahanda’i da jongan Ia toka, 21 da aya butongto anu ma’ide-idek na tokamo hi’ mae nu abali’ i Kristus da pokakanamo hi’ butongNyo anu jingkahahakan. Mokonyo’ nupokoala na mombau susumo atu, maka’ Ia ahi’ na mongkuasai iwi-iwi’.
4
Puusnyo nu pokinde’ i Paulus hi jema’at nu Filipi
1 Ingkop atu da toka atina’ hi komiu sangalu anu hi’ kukalibosi, na komiu tumuu’, saja’ ahi’ taha’iman hi Tumpu totu-totu’u. Ingkop uka na aku liing ahi’ da mompahakabot komiu, maka’ atina’ ahi’ komiu na moko pajama’ tiba moko bangga’ aya aku.
2 Ingkop atina’ mule’ komiu hai Euodia tiba i Sintikhe na pagala hi’ kupoita da mosa’angu’ ahi’ boli hi’ mosi tuka-tuka’ anu otutugi, maka’ atina’ komiu na mian ahi’ anu mompolinganga’ Tumpu.
3 Toka mule’ hi sangalungku anu saja’ mongkakebuhakon nonsangaja’akon mae nontoluk ma’ima-ima’ aku nokalajaa, na lako’ ahi’ otulungi na hai Euodia ua hai Sintikhe da aha kopian ahi’. Maka’ aha na nompaha sangaja’akon ahi’ mae aku nongkakebuhakon nonsisikakon hi mian koda-koda’isan Lele Ma’ima’. Aha na nokalajaa ahi’ hi Anu Nonsihang gampanyo i Klemen tiba mule’ batu-batu mian anu nonsaimpoka-pokalajaa gampanyo aku. Ingkop sanggo nu aha aya anu batu-batu anu nontulungi mae aku na tinuliso ahi’ i Buuk nu Anu Nonsihang pontulisanNyo mian anu montumpui Kantumuu’an anu sidu-sidutu’.
4 Ingkop uka na bisa-bisa’ ahi’ da saja’ ahi’ komiu majama’, maka’ komiu na nosa’angu’o ahi’ ka’ Anu Nonsihang. Uka poule’ ku’ulit: Majama’ ahi’ na komiu!
5 Sa’angu’ mule’ da toka atina’ hi komiu na opotoa ahi’ hi mian na bauon miu ma’ima’ ahi’ na kinyonyoa ka’ tatap ahi’. Maka’ uka na kolia-lia’nyomo ahi’ na katokaan nu Tumpu!
6 Ka’ boli hi’ komiu meat pa’ apaa utu na tempo’nyo komiu monta’up susa’. Lahi’ opoita hi Anu Nonsihang na anu opalalu miu toka hi’ minsan balado’a, ka’ saja’ ahi’ montalimakase hi Ia.
7 Maka’ de obau miu sumo atu na pasasawe’nyo Tumpu ahi’ na mombalakaati komiu da komiu tenaang ahi’ totu-totu’u. Maka’ Anu Nonsihang mompotenaang mae na madi’ ahi’ ko opoko sumbu’ nu pontutugi nu kita tomianan, da kinyonyoa miu na boli hi’ koanu okameatakon, maka’ komiu nosa’angu’o ahi’ i Kristus Yesus.
8 Ingkop uka na koanu hi’ kusisik hi komiu to utu-utus aya i kapupusannyo anu kusisik aya i sulat, da toka hi komiu na lahi’ saja’ anu totu’u na otutugi ka’ anu hi’ timbali opopodaka’ tiba anu adin i mata nu Anu Nonsihang tiba mule’ tomianan, anu hi’ ma’ima’, anu molonde’, anu hi’ moko polumu kinyonyoa, otutugi ahi’ toka hi komiu na aitu iwi-iwi’.
9 Toka hi komiu na saja’ ahi’ obau na uka anu lewa’ ilioan miu tiba tinalima miu ka’ uka anu lewa’ i hongo miu hiyau’. Osonto’ ahi’ mae na uka kantumuu’anku anu lewa’ tinoa miu mae. Maka’ de obau miu sumo atu, na Anu hi’ Nonsihang uka anu mombalakaati da kinyonyoa miu tenaang, na monsangalui komiu.
Bau-baunyo nu i Paulus nontalimakase hi jema’at u Filipi nontulungi ia
10 Ingkop uka na aku majama’ ahi’ tongko’ maka’ nosa’angu’o ahi’ ka’ Tumpu. Maka’ naumo uka piniino ahi’ na kita noga’at, be tataap ahi’ pinonyata’ ahi’ miu na komiu monginau’ ahi’ mae aya aku. Maka’ atina’ komiu na totu’u ahi’ saja’ ahi’ monginau’ mae aya aku, panyo tempo’nyo atu na ma’isa hi’ komiu kinotempo’ nontulungi mae aku.
11 Panyo aya aku monsisik susumo aya, na misa’ ahi’ ko kaliangannyo aku monsisik hi komiu uka na aku kina’alusano i anu opake, maka’ hiyau’ na pinokunayangkumo ahi’ da lahi’ apaa na anu dagi’o sukupo ahi’. 12 Maka’ pinoko paha piangkumo ahi’ na manjoo’ na nu opake tiba na madi’. Ingkop kusumbu’o ahi’ na bau-baunyo nu mongahopi susumo atu anu ota’up pa’ apaa utu. Susumo atu mo’ohop kabai na mobosu. Susumo atu molabi-labi na anu opake kabai madi’ sukup kusumbu’o ahi’ na bau-baunyo. 13 Maka’ i Kristus ahi’ na mompokohoson mae, da apaa na anu kuta’up opokoala ahi’ na mongahopi.
14 Panyo naumo na sumo atu, be uka anu lewa’ binau miu na mosangu’ hi’ ma’ima’, maka’ komiu nontulungi hi’ mae aku uka tempo’nyo aku nonta’up susa’.
15 Maka’ uka na malingkoyaamo ahi’ toka hi komiu jema’at anu i Filipi, uka mae salataa aku nambaa nompala’ii Makedonia, nonsisikakon aitu Lele Ma’ima’ i kijo’ mae, uka mae sasalataa, na lahi’ sa-sa’angu’ komiu na nontulungi mae aku nombee’i mae doi. 16 Maka’ uka pe’e aku tinokamo i Tesalonika, be madi’ ahi’ ko la ninsan na komiu nombee’i mae aku bantuan.
17 Panyo ka’ kusisik susumo uka na misa’ ahi’ ko kaliangannyo aku mongkahanda’i da poule’ aku obee’i miu mae bantuan. Anu kukahanda’i hi komiu, na aitu hi’ da kutoa ahi’ na komiu mompaka kobababihingnyo na mombau ma’ima-ima’, da komiu nupaka balakaati hi’ mae nu Anu Nonsihang.
18 Ingkop uka na tinalimangkumo ahi’ iwi-iwi’ lengkat hi komiu na anu kupalalu, atu pe’e na molabi-labimo ahi’ i anu kupake na uka tulungan anu binee’ miu mae hiyau’. Maka’ uka bantuan anu pinakatuakon miu mae hiyau’ na tokamo hi’ mae pinoko bee’ i Epafroditus hiyau’ iwi-iwi’. Uka na apono ahi’ na anu kupalalu. Uka mule’ bantuan anu binee’ miu mae, na sumo hi’ balu-balu’ nu hana’u anu opapuakon, anu ma’ima’ na hongohisnyo toka hi Anu Nonsihang. Hana’u anu susumo atu na nutalima ahi’ nu Anu Nonsihang maka’ pongka’oho’Nyo ahi’.
19 Ingkop uka na kupoitakon ahi’ da Anumo hi’ Nonsihang anu lewa’ kusangke na mompangakui anu opalalu miu. PompangakuiNyo mule’ komiu na aitumo hi’ kakaya’anNyo anu mosi panjoo’, anu binee’Nyo mae hi mianNyo maka’ aha nosa’angu’o ahi’ hi Kristus Yesus.
20 Ingkop toka hi kita na lahi’ ounde’ lambaakonnyo na Anu Nonsihang uka Tumanto! Amin.
21 Toka osisikakon, salam lengkat hiyau’ toka hi sangalu iwi-iwi’ na anu mompolinganga’o Anu Nonsihang, anu sa-sa’angu’o ka’ i Kristus Yesus. Tiba mule’ aya sangalu anu aya hiyau’ na singkona hi’ monsisik, salam hi komiu.
22 Tiba aya sangalu batu-batu anu mompolinganga’o anu aya i kota’ aya, suba-subanyo aha anu jojoong mokalajaa i laigan nu tomundo’ u Roma, singkona hi’ nonsisik, salam hi komiu iwi-iwi’ anu itina’ mae.
23 Bisa-bisa’ ahi’ i Tumpu Yesus Kristus na mombalakaati komiu to utu-utus iwi-iwi’.