Kolose
1
I Paulus nombuka’ sisik
1 Sulat aya lengkat hiyau’ i Paulus anu binee’anNyo mae kuasa da mombutongakon i Kristus Yesus, maka’ totonggon ahi’ pongka’oho’ ahi’ nu Anu Nonsihang na aku mombutongakon Ia, tiba mule’ maka’ tiba hi’ i Timotius utusto na mompaha sangaja’akon aya montulis sulat. 2 Ingkop sulat aya na tinulisku hi komiu to utu-utus anu tinimbalimo mian nu Anu Nonsihang anu saja’ mombatuki totu-totu’u i Kristus atina’ mae i kota’ u Kolose. Bisa-bisa’ ahi’ Anu Nonsihang uka Tumanto na mombalakaati komiu da boli hi’ koanu okasusa’akon.
I Paulus najama’ na nonsumbu’ mian nu Kolose nompolinganga’o ka’ mongkalibosi
3 Maka’ toka hi’ minsan kami momoitaakon komiu, kami saja’ ahi’ majama’ hi Anu Nonsihang uka Tuma nu Tumpunto i Yesus Kristus, 4 na mohongo itina’ mae komiu saja’ ahi’ taha’iman ahi’ totu-totu’u hi Kristus Yesus ka’ mongkalibosi bubuu’ mian nu Anu Nonsihang. 5 Komiu nompolinganga’ ahi’ ka’ maingkali-kalibosian, maka’ sinumbu’o ahi’ miu tio-tio ahi’ otalimanto na anu pinoguhatakono nu Anu Nonsihang hi kita, kita’ mae i sulugaa’. Maka’ lewa’o ahi’ ilioan miu na aitu, uka tempo’nyo komiu nohongo Lele Ma’ima’ bau-baunyo nu i Yesus, aitu ajaran anu totu-totu’u 6 anu pinotingaano hi komiu. Maka’ aitu Lele Ma’ima’ na mimbua’ ahi’ ka’ modensu’ aya i dunia momokijo’ i puus u tano’, sumo hi’ atumo na atina’ komiu uka salataa tempo’nyo komiu nohongo ka’ nalingkoyaa totu-totu’u na uka libos nu Anu Nonsihang anu la tutuk binee’Nyomo mae.
7 Aitu na anu toka pinotingaan i Epafras anu okalibosi mami. Ia na sangalu hi’ mami anu montolukakon totu-totu’u kalajaa i Kristus hi komiu. Maka’ iamo ahi’ na nombutongakon kami nokalajaa totu-totu’u atina’ mae hi komiu. 8 Maka’ uka ia tinoka aya hi kami na tokamo hi’ mae pinalingkoyaakonnyo na komiu tahuu hi’ mongkalibosi mae kami, tiba mule’ batu-batu sangalu mian nu Anu Nonsihang tiba mule’ komiu mongkalibosi, na lengkat ahi’ i Kinyonyoa nu Tumpu.
9 Aitu na mokonyo’ saja’ ahi’ lewa’ opoitaakon mami na komiu salataa pe’e ahi’ kami nohongo bau-baunyo nu atina’ mae komiu. Opoitaakon ahi’ mami hi Anu Nonsihang da Kinyonyoamo ahi’ u Tumpu na mombee’i kapandean komiu. Opoitaakon ahi’ mami, da osumbu’ ahi’ miu iwi-iwi’ na anu pokakana pongka’oho’ u Anu Nonsihang. 10 Opoitaakon ahi’ mami, da kantumuu’an miu pokakana ahi’ pongka’oho’ u Anu Nonsihang. Opoitaakon ahi’ mami da saja’ ahi’ monsongka’ KinyonyoaNyo. Opoitaakon ahi’ mami da apaa na anu lako’ obau miu na pasasawe’nyo ma’ima’ ahi’ ka’ saja’ ahi’ kopintu-pintuangnyo na komiu monsumbu’ bau-baunyo nu Anu Nonsihang. 11 Bisa-bisa’ ahi’ kuasa nu Anu Nonsihang anu mata-matangkas na mompokohoson komiu, da naumo pa’ apaa na lusa’ anu ota’up miu, opokoala hi’ miu na montatapakon ka’ majama’ na kinyonyoa 12 ka’ montalimakase hi Tuma aitu Anu Nonsihang. Maka’ posi Ia ahi’ na nohangkat komiu da halus ahi’ montalima anu pinoguhatakonNyo hi mianNyo kita’ i kajojoonganNyo Ia mompalenta, anu jingka-jingkahahakan.
13 Anu Nonsihang nompolapas kita lengkat i kuasa nu anu i pikat ka’ kita binoanyo ahi’ kopi-kopian mokita’ i kajojoongan nu AnakNyo mompalenta, aitu anakNyo anu Nukalibosi nu Anu Nonsihang. 14 Aitumo hi’ AnakNyo na toka mae nontobusakon kita, da nuampunimo ahi’ mae na dosa’to.
15 Maka’ ukamo ahi’ i Kristus Yesus na pontoaananto iwi-iwi’ na sipat nu Anu Nonsihang anu madi’ otoa-toa. Aitu Ia na anak ahi’ tumpe, maka’ iwi-iwi’ na anu binau Ia ahi’ na tahuu matangkas. 16 Maka’ iwi-iwi’ na anu binau nu Anu Nonsihang na aitumo hi’ Ia na nombau, anu kita’ mae i sulugaa’ tiba aya tano’, anu otoa nu mata tiba anu imadi’, tiba to mala-mala’ikat anu mongkuasai kabai na pamalenta, buu’ ahi’ Ia na nombau. Iwi-iwi’ ahi’ buu’ ahi’ i Kristus na nombau, kakonaannyo da iwi-iwi’ bau hi’ pompopodaka’an Ia.
17 Maka’ Ia na ma’isa pe’e ahi’ koanu tinimbali, Ia na polo-polo’o ahi’ kino IaNyo. Iwi-iwi’ Iamo ahi’ na nombau ka’ pinosi po’u-po’una’Nyomo ahi’ kijo’ i tampatnyo na sangahan tiba sangahan.
18 Oboamo susumo i butong, Ia ahi’ na ubak jema’at na butongNyo. Iamo ahi’ na mompotumuu’ butong. Maka’ Iamo ahi’ na anak tumpe nu Anu Nonsihang, anu hi’ salataa tongko’ poule’ tinumuu’ noko silaka, da iwi-iwi’ na Ia ahi’ na tahuu opopohimona.
19 Maka’ tinogitosan ahi’ nu Anu Nonsihang kokonyo iwi-iwi’ na sipat nu Anu Nonsihang, buu’ ahi’ kijo’ hi Ia, 20 tiba mule’ AnakNyo aitu na mongkopianakon iwi-iwi’ ka’ Ia, naumo anu aya i dunia tiba anu kita’ mae i sulugaa’. Ingkop aitu na binau nu Anu Nonsihang uka Ia sinilaka i kau’ salip na aitu anakNyo.
21 Atina’ mule’ mae komiu uka mae na najo’ono ahi’ ka’ Anu Nonsihang anu hi’ nompaha ili’o ahi’ Ia i kinyonyoa, uka lewa’ komiu montutugi nombau ma’ide-idek. 22 Panyo uka na komiu poule’o ahi’ kinopian ka’ Anu Nonsihang, uka toka mae Ia tinimbali mian na i Yesus ka’ sinilaka, na poule’ nongkopianakon komiu ka’ Anu Nonsihang, da komiu nuboa toka mompaha kabot Anu Nonsihang, na komiu molonde’ ahi’ boli hi’ koton.
23 Ingkop atu na mokonyo’ toka atina’ hi komiu tio hi’ saja’ taha’iman, boli hi’ gagana’ komiu polenggon, tataap ahi’ mintoong madodo-dodo. Maka’ lengkat ahi’ i Lele Ma’ima’ na ponsumbu’anto tio-tio ahi’ otalima na anu pinoguhatakon nu Anu Nonsihang hi kita. Ingkop otoongi ahi’ na aitu madodo-dodo. Aitu Lele Ma’ima’ anu ihongo miu, uka anu pinoleleakono hi mian iwi-iwi’ anu aya i dunia.
Maka’ aitumo ahi’ na kalajaangku susumo uka, akumo ahi’ i Paulus na tinimbali monsisikakon bele nu mian Lele Ma’ima’ aitu.
Kalajaa i Paulus toka mian anu nombatuki i Kristus
24 Ingkop uka na aku majama’ ahi’ maka’ kusumbu’ ahi’ aku monta’up lusa’ aya i talungku’an susumo aya, na maka’ sabenanyo lahi’ kalana aku montolukakon ahi’ anu opalalu miu, iwi-iwi’ na anu mombatuki i Kristus. Maka’ oboamo i butong, kita iwi-iwi’ na anu mompolinganga’ na ngahanan ahi’ nu butong i Kristus aya i dunia. Ingkop de koanu sala’ sa’angu’ na ngahanan nu butong i Kristus aya i dunia lusa’ na maka’ Ia singkona ahi’ mompia lusa’. Ingkop susumo i ngahanan nu butongNyo, aku na pinile’anNyomo ahi’ monta’up ahi’ lusa’ aya i talungku’an susumo aya, da mompokododo ahi’ batu-batu mian anu mompolinganga’ Ia.
25 Akumo ahi’ na pinotade mae nu Anu Nonsihang da montolukakon kapalaluan miu. Ingkop toka hiyau’ na tio hi’ kusisikakon na Sisik u Tumpu iwi-iwi’, 26 aitu anu binini nu Anu Nonsihang naipuan pe’e lapis toka lapis, panyo uka na tokamo hi’ mae pinonyata’Nyo hi mianNyo.
27 Maka’ pongka’oho’ nu Anu Nonsihang da toka hi mianNyo, na sainsumbu’ ahi’ tahuu hi’ tongko’ mosi pa’ima’ tiba matangkas na Lele Ma’ima’ aitu anu dai’ bininiNyo uka mae, tiba mule’ susumo atina’ mae komiu anu misa’ pe’e bubuu’ mian nu Yahudi singkonamo hi’ nonsumbu’. Maka’ pu’unyo nu Lele Ma’ima’ aitu, na uka hi’ i Kristus itina’o ahi’ hi komiu. Ingkop uka na komiu mompopea’i ahi’ tio-tio hi’ komiu mohumpak bagian anu lengkat hi Anu Nonsihang anu kita’ mae i sulugaa’ kita’ mae i unonyo.
28 Aitu na mokonyo’ toka hi kami anu mombutongakon i Yesus saja’ opotingaanakon mami na aitu Lele Ma’ima’. Maka’ lewa’ ahi’ okakebuhakon mami na mompokinde’ tiba mompotingaan sangalu samian toka samian. Atu mule’ kami nompotingaan komiu na pinotingaan ahi’ mami nu kapandean anu binee’ mae nu Anu Nonsihang. Maka’ kahanda’ mami da da’isan ahi’ na anu monsolok Anu Nonsihang ka’ mosa’angu’ i Kristus anu hi’ molonde’ mosi pa’ima’.
29 Aitu ahi’ na hiyau’ kususa’akon ka’ kukakebuhakon ka’ aku toseha ahi’ hi Yesus anu saja’ mompokohoson mae aku.
2
1 Ingkop atu da toka atina’ mae hi komiu, tiba aha anu mompolinganga’o anu jojoong i kota’ u Laodikia iwi-iwi’ na anu ma’isa toho’ nompahakabot aku, na malingkoyaa ahi’ na aku nongkakebuhakon totu-totu’u nontulungi komiu.
2 Binaungku hi’ sumo atu da kinyonyoa miu tiba kinyonyoa nu aha buu’ ahi’ madodo ka’ komiu maingkali- kalibosian ahi’ samian toka samian da timbali hi’ madodo na posa’angu’an miu. Pasasawe’nyo komiu tiba aha boli hi’ gagana’ mohua’ maka’ malingkoyaamo ahi’ totu-totu’u na i Kristus, anu dai’ binini nu Anu Nonsihang uka mae.
3 Maka’ ukamo ahi’ i Kristus na toka mae nomposumbu’ hi kita iwi-iwi’ na bau-baunyo nu kapandean tiba ponsuak nu Anu Nonsihang, uka anu dai’ bininiNyo uka mae.
4 Ingkop uka mokonyo’ kusisik susumo aya, da boli hi’ koanu toka mae mompotalas komiu nupotatae anu ma’ima’ na mohongo. 5 Maka’ naumo aya aku majo’on ahi’ komiu, be toka itina’ hi komiu na saja’ ahi’ oinau’ susumo hi’ aku itina’ ahi’ ahu-ahum hi komiu, da aku majama’ ahi’ na mosumbu’ itina’ komiu mosa’angu’ ka’ madodo na montaha’imani i Kristus.
Bau-baunyo nu Anu Nonsihang nongampuni dosa’to kalana kita nompolinganga’ i Kristus
6 Ingkop atu da toka atina’ hi komiu sangalu anu mombatuki totu-totu’u i Kristus Yesus na Tumpu, na saja’ ahi’ mosa’angu’ hi Ia na kantumuu’an miu, ka’ opu’ui ahi’ lengkat hi Ia. 7 Oboamo susumo i laigan opotinjo ahi’ i pundasi uka i Kristus na pundasinyo tiba susumo i kau’ ia lubat mimbakat ahi’ mokayong i tano’ ka’ madodo.
Da toka atina’ hi komiu na mompaka kobababihingnyo ahi’ na montaha’imani i Kristus pokakana ahi’ uka anu pinotingaanakono hi komiu, ka’ komiu montalimakase ahi’ manyonjoo’ hi Ia.
8 Ingkop toka atina’ hi komiu na opoposohop ahi’ maka’ jumo susumo i musu’ toka mae koanu montawan komiu nu anu oposi tuka’ nu tomianan anu madi’ ko kaliangannyo ka’ ajaran anu mompotalas. Maka’ susumo atu posi pontutugi nu tomianan na misa’ ahi’ ko lengkat hi Kristus, lengkat ahi’ i tomianan tiba susumo atu aha to se-setan anu mongkuasai anu aya i dunia.
9 Maka’ iwi-iwi’ na sipat nu Anu Nonsihang na buu’ ahi’ uka hi Kristus, uka toka mae Ia tinimbali mian na butongNyo. 10 Ingkop kalana komiu nosa’angu’o ahi’ ka’ i Kristus, maka’ komiu pe’e nontalimamo ahi’ kantumuu’an anu totu-totu’u. Maka’ i Kristus ahi’ na montu’a-tu’anyoi ka’ mompalenta iwi-iwi’.
11 Maka’ atina’ komiu nosa’angu’o ka’ i Kristus, na susumo hi’ komiu sinunato ahi’. Atu mule’ na misa’ ahi’ ko sunat aya i kilit anu obau nu tomianan, sunat ahi’ anu toka mae binau i Kristus. Ingkop atu na ponsumbu’ komiu pinolapaso ahi’ i Kristus lengkat i kuasa nu dosa’. 12 Maka’ tempo’nyo komiu pinalamandiam, na ponsisik ahi’ komiu sinilaka ahi’ ka’ ilambun gampanyo i Kristus, toka atu poule’ ahi’ binulakon nu Anu Nonsihang gampanyo i Kristus, da komiu monta’upo ahi’ kantumuu’an anu bu’ou. Mokonyo’ sumo atu maka’ pinolinganga’ ahi’ miu na kuasa nu Anu Nonsihang na poule’ nompotumuu’ i Kristus.
13 Maka’ uka mae na susumo hi’ komiu sinilakamo ahi’ na pontoa mae nu Anu Nonsihang, maka’ noga’ato ahi’ ka’ Ia, nongga’atakon mule’ komiu ka’ Anu Nonsihang na atina’ ahi’ dosa’ miu tiba susumo i sunat aya i kilit, komiu madi’ ahi’ ko sinunat. Panyo uka na poule’o ahi’ komiu binulakon nu Anu Nonsihang da poule’ tinumuu’ gampanyo i Kristus. Ponsisik Anu Nonsihang na tahuu hi’ manonong, Ia nongampuni hi’ mae iwi-iwi’ na kasala’anto, 14 tiba oboamo susumo i sulat nu samaya’ na ihapusnyomo ahi’ nu Anu Nonsihang na kasala’an anu tinuliso kijo’ i buuk, aitu batu-batu kasala’anto kita nombahaakon palentaNyo. Ingkop atu na sinaimposu-posulamo ahi’ ka’ i Kristus i kau’ salip.
15 Maka’ uka Ia pinosula na pinaha buhukanNyomo ahi’ iwi-iwi’ na to se-setan anu lewa’ mongkuasai. Balu-balu’ ahi’ nu anu pinungumo ahi’ i Kristus ka’ binau palumpeja’anNyo da toka hi mian anu aya i dunia sainsumbu’ ahi’ iwi-iwi’ pinaha buhukanNyomo ahi’.
16 Ingkop toka itina’ hi komiu na boli hi’ opotuhu da komiu nupisala’i mae nu mian, susumo atu bau-baunyo nu anu okaan tiba anu oinum kabai na susumo atu sina daka’ anu lewa’ pobuke’an kabai na susumo atu molame’akon bitu’on bu’ou kabai na susumo atu sina nu hari Sabtu. 17 Maka’ atulan aitu na iwi-iwi’ lahi’ pea-pea’ uka ma’isa tinoka na i Yesus, maka’ uka manau’ Ia tinokamo, na anu aitu na madi’o ahi’. Maka’ lahi’ nongambalakon aitu anu totu-totu’u, aitu i Kristus.
18 Ka’ boli hi’ opobee’ da komiu nu adulakon nu aha anu monggagau’ matialuk, da madi’ otokai na anu sabenanyo otumpui miu. Maka’ aitu aha na lewa’ ahi’ monsangke to mala-mala’ikat ka’ lewa’ bangga’ susumo atu i anu lewa’ matupopia na anu okabangangi ka’ lewa’ aha mompopotangkas butong jo madi’ ahi’ ko pu’unyo. Maka’ atu lahi’ anu nu posi tuka’ i kinyonyoanyo, lahi’ montutugi anu aya i dunia.
19 Madi’ ahi’ ko aha mintoong hi Kristus, anu hi’ oboamo susumo i butong ata’ ubak, i Kristus ahi’ na mongatun. Susumo i butong, ata’ ahi’ ubak aitu i Kristus na mongatun akaong butong mompotuu’ ka’ nu posa’angu’ da mosumpak i to losu-losuan, da ia modensu’ tumuu’ pokakana ahi’ pongka’oho’ nu Anu Nonsihang.
Silaka tiba poule’ tumuu’ gampanyo i Kristus
20 Maka’ atina’ komiu na uka sinilaka na i Kristus komiu pe’e balu-balu’ ahi’ nu singkonamo ahi’ sinilaka, madi’o ahi’ nutu’a-tu’anyoi nu aha to se-setan anu mongkuasai anu aya i dunia. Ingkop komiu tumuu’ na bolimo ahi’ montiho kantumuu’an nu mian anu dai’ nutu’a-tu’anyoi nu bauon nu aya dunia. Bolimo hi’ komiu nutu’a-tu’anyoi nu atulan, 21 susumo atu konyo, “Boli lako’ otoongi na aya, boli lako’ otiik na aya, boli lako’ onyamit na atu!” 22 Maka’ aitu na lahi’ minsan mompake, madi’ ahi’ ko pinduan, maka’ atulan anu susumo atu na lahi’ palenta tiba ajaran nu tomianan.
23 Maka’ aitu aha anu mombau atulan anu susumo atu, na maka’ pontoa na tahahumo ahi’ na monsuak, lewa’ ahi’ lako’ mompotingaan mian da monsangke to mala-mala’ikat, ka’ monggagau’ matialuk, panyo madi’ ahi’ ko totu’u, ka’ lewa’ mosi lusa’ posi butongnyo, aitu modoso’ i anu sabenanyo nupalalu ahi’ nu butong da moko sehat. Ingkop anu susumo atu na madi’ ahi’ ko mingkaliangan moko poho’ pongka’oho’ nu kinyonyoa salapis.
3
1 Ingkop atina’ komiu na poule’o ahi’ tinumuu’ gampanyo i Kristus. Ingkop toka atina’ hi komiu na anu hi’ kita’ mae i sulugaa’ na lewa’ otutugi ka’ okakebuhakon, kita’ mae anu kajojoongan i Kristus, anu hi’ suha-suhang ahi’ i koanan nu Anu Nonsihang.
2 Atu ahi’ na anu saja’ otutugi miu, boli hi’ saja’ montutugi anu aya i dunia. 3 Maka’ kantumuu’an miu uka mae na sinilakamo ahi’, atina’ mule’ kantumuu’an miu anu totu-totu’u na mahuini ahi’, gampanyo i Kristus, anu hi’ tua-tuang ka’ Anu Nonsihang. 4 Maka’ pu’unyo nu kantumuu’an miu anu totu-totu’u na uka hi’ i Kristus. Ingkop saidi’ mae manau’ poule’o mae Ia toka na i Yesus na komiu pe’e singkona hi’ matupopia gampanyo Ia ka’ singkonamo hi’ jingkahahakan susumo Ia.
Kantumuu’an naipuan tiba kantumuu’an anu bu’ou
5 Ingkop atu da toka atina’ hi komiu na otibahakon ahi’ iwi-iwi’ na bauon nu dunia anu mongedei komiu, susumo atu babodo-bodo’ ka’ mongkahanda’i mombau bodo-bodo’ tiba susumo atu lewa’ mongindii mombau ma’ide-idek, tiba susumo atu saja’ mongindii konyo’ pe’e mompaka panjoo’. Maka’ anu susumo atu na pokakana ahi’ monsangke anu ipikat. 6 Mian anu mombau susumo atu na nukona ahi’ nu tambuha’ nu Anu Nonsihang.
7 Maka’ uka mae na lewa’ ahi’ binau miu na bauon anu susumo atu, tempo’nyo dai’ aitu na nontu’a-tu’anyoi komiu. 8 Panyo uka na toka atina’ hi komiu na otibahakon ahi’, bolimo hi’ obau na bauon anu ma’idek, susumo atu pusa, otatapakon ahi’, boli hi’ lewa’ tolosega tiba sumo atu monsainguna’ i kinyonyoa mongkaideki samian. Tiba mule’ boli hi’ sangkalinga komiu montanggele kabai na motatae anu ma’idek hi samian. 9 Boli hi’ lewa’ komiu maimbale-baleko’ian samian toka samian, maka’ pinoko tibahakono hi’ miu na kantumuu’an naipuan tiba bauon anu ma’ide-idek.
10 Ingkop uka na susumo i baju’ nompakemo ahi’ baju’ anu bu’ou ka’ saja’ ahi’ nupokoima’i nu Anu Nonsihang anu nombau komiu, na kantumuu’an miu, da montiho ahi’ Ia. Soa’nyo na aitu hi’ da toka hi komiu osumbu’ ahi’ ma’ima-ima’ na bau-baunyo nu Anu Nonsihang.
11 Pasasawe’nyo na madi’o hi’ ko gihananyo na mian nu Yunani tiba mian nu Yahudi, anu sinunat tiba na anu madi’, anu lengkat i to suku-suku saga’at tiba anu halipulu, botuan tiba na misa’, maka’ anu palalu toka hi kita na aitu hi’ kita iwi-iwi’ tinimbalimo hi’ sa-sa’angu’ pokakana ahi’ maka’ kita pinosa’angu’o ahi’ i Kristus.
12 Maka’ atina’ komiu na miano ahi’ nu Anu Nonsihang. Komiu kinalibosanNyo ahi’ ka’ pinile’anNyo da Iamo ahi’ na montumpui, anu hi’ pinosi potadeNyo. Aitu na mokonyo’ toka hi komiu tio hi’ opotoa miu na mongkalibosi ka’ manonong hi samian ka’ matialuk ahi’ ka’ boli hi’ kasan hi samian ka’ otatapakon ahi’ na kinyonyoa. 13 Ingkop toka hi komiu na otatapakon ahi’ na kinyonyoa samian toka samian ka’ maingampu-ampunian na de koanu mompaha sala’ ka’ mompoinau’akon kijo’ samian, maka’ Tumpu pe’e be posi kasanaanganNyo ahi’ na Ia nongampuni komiu. Ingkop toka pe’e atina’ hi komiu be maingampu-ampunian ahi’.
14 Panyo pu’unyo anu opopohimona toka hi komiu, na tio-tio hi’ aitu maingkali-kalibosian, maka’ atu hi’ mongkalibosi na momposa’angu’ komiu da posa’angu’an miu sampa’ ahi’.
15 Da toka hi komiu na kopiano ahi’ tiba mian saga’at, ka’ ukamo hi’ balakaat anu binee’ i Kristus i kinyonyoa miu na mompalenta montogitosi anu obau miu. Maka’ komiu na ilagamo ahi’ nu Anu Nonsihang da komiu oboamo i butong komiu sambu-sambutongo ahi’. Ingkop toka hi komiu na majama’ ahi’ hi Ia.
16 Ingkop atu da ukamo hi’ ajaran i Kristus na mongkuasai kantumuu’an miu, da komiu monsuak ahi’ maimpoti-potingaanan ka’ mainsisi-sisikian ka’ lewa’ monyanyi nyanyian anu nupokau nu Kinyonyoa nu Tumpu tiba nyanyian anu lengkat i kitab naipuan tiba nyanyian mongunde’ Anu Nonsihang ka’ majama’ ahi’ hi Anu Nonsihang i kinyonyoa miu.
17 Ingkop toka hi komiu na apaa na anu osisik tiba anu obau na anu hi’ mombutongakon ahi’ i Tumpu Yesus, ka’ majama’ hi Anu Nonsihang uka Tumanto, uka anu binau mae i Kristus hi komiu.
Bau-baunyo nu kantumuu’an nu luma tangga anu mompolinganga’
18 Ingkop basisik mule’ susumo atu luma tangga anu mompolinganga’, maka’ toka susumo atina’ hi komiu to bo-boune anu nosoamo na matialuk ahi’ hi langkai’ miu, sumo hi’ atu na mian anu mombatuki Tumpu.
19 Komiu mule’ to momo’ane anu nosoamo, maka’ okalibosi ahi’ na bengkele’ miu ka’ boli hi’ kasan hi ia.
20 Komiu mule’ to ana-anak anu mompolinganga’ i Kristus na saja’ ahi’ matialuk hi tu’anyo miu, maka’ sumo hi’ atu na monsongka’ Anu Nonsihang.
21 Komiu mule’ to tutuma boli hi’ oedei na kinyonyoa nu to ana-anakum tiba saja’ mompisa-pisala’i, da toka hi aha boli hi’ aha kojoa.
22 Komiu mule’ to botu-botuan, maka’ saja’ ahi’ matialuk hi tu’anyo miu anu montumpui komiu aya i dunia. Boli hi la dai’ ko aha atu ahu-ahum na matialuk, da komiu nu unde’. Matialuk ahi’ tongko-tongko’ lengkat i kinyonyoa molonde’, kalana komiu matakut ahi’ hi Tumpu.
23 Apaa na anu lako’ obau miu hi tu’anyo miu na otoluk ahi’ tongko-tongko’ lengkat i kinyonyoa, maka’ sabenanyo na komiu mokalajaa ahi’ hi Tumpu, misa’ ahi’ ko la tomianan. 24 Maka’ oinau’ ahi’ toka hi komiu, Tumpu ahi’ na mombee’ tamboonyo hi komiu. Maka’ apaa na anu pinoguhatakonnyo hi mianNyo, atu ahi’ na nubee’ hi komiu. Maka’ sabenanyo tu’anyo anu pokalajaan miu na maka’ posi i Kristus ahi’ misa’ ahi’ ko la tomianan.
25 Ingkop de iyee na anu mombau sala’, maka’ posi ia na monta’up pasasawe’nyo nu kijo’ bauonnyo, maka’ Tumpu na madi’ ahi’ ko monggihan mian daka’ tiba mian ite’.
4
1 Toka mule’ atina’ hi komiu tu’anyo anu montumpui botuan, na anu hi’ sahondo-hondonyo ka’ ma’ima’ na obau hi aha botuan miu, oinau’ ahi’ komiu pe’e ko tu’anyo ahi’ anu kita’ mae i sulugaa’ montumpui mae komiu.
Mompotingaan bau-baunyo nu balado’a tiba lewa’ mosangalu mian.
2 Ingkop toka hi komiu na saja’ ahi’ okakebuhakon na monsamposisik Tumpu, ka’ saja’ ahi’ osohop, ka’ majama’ hi Anu Nonsihang.
3 Kami mule’ singkona hi’ opoitaakon mae hi Anu Nonsihang, da nubee’i hi’ mae jalan, monsisikakon Lele Ma’ima’ bau-baunyo nu i Kristus uka anu dai’ binini nu Anu Nonsihang uka mae. Maka’ aitu ahi’ na anu lewa’ binaungku mokonyo’ aku pinosoop i talungku’an susumo aya. 4 Opoitaakon ahi’ mae da kupokoala ahi’ na mompalingkoyaakon ma’ima-ima’ hi mian aitu bau-baunyo nu i Kristus anu dai’ binini nu Anu Nonsihang uka mae, maka’ sumo hi’ atu na anu halus lako’ kubau.
5 Toka mule’ atina’ hi komiu na otutugi ahi’ ma’ima-ima’ da osuak ahi’ na anu obau hi aha anu ma’isa mompolinganga’, otutugi ahi’ ma’ima-ima’ na tempo’ komiu basisik tiba aha, da opopotangkas ahi’ na Ia. 6 Susumo atu mule’ komiu motatae na anu hi’ ma’ima’ na mohongo, susumo i kaanon matami’ ahi’ na mongkaan, da toka hi komiu apaa na anu nupokilawa mae nu mian, osumbu’ ahi’ na montaami.
Kinapupusannyo nu anu sinisik ka’ salam i Paulus hi jema’at nu Kolose
7 Ingkop uka na i Tikhikus ahi’ utusto anu okalibosi na toka monsisik hi komiu iwi-iwi’ na anu kuta’up susumo uka. Maka’ ia na anu hi’ nonsaimpoka-pokalajaa ma’ima-ima’ hi Tumpu tiba kami.
8 Maka’ uka na kupokau ahi’ na ia, da moitina’ hi komiu da toka hi komiu molumu ahi’ na kinyonyoa ka’ osumbu’ ahi’ miu mae iwi-iwi’ na anu ota’up mami.
9 Ka’ tiba hi’ i Onesimus na pinokaungku da singkona mambaa mojajalan i Tikhikus. Maka’ ia na lengkat ahi’ itina’ mae hi komiu anu hi’ bubuu’ mompolinganga’. Ia na anu hi’ montoluk kalajaa nu Tumpu ma’ima-ima’ ka’ okalibosi ahi’ mami. Ahamo ahi’ na toka monsisik iwi-iwi’ anu jinadi aya i tampat anu kajo-kajojoonganku.
10 Aya mule’ i Aristarkhus anu aya i talungku’an gampanyo aku na mompakatu hi’ salam hi komiu tiba i Markus uka anu mombabo’ i Barnabas. Ingkop aya i Markus na pinoko poto’imo ahi’ hi komiu da manau’ ia tokamo itina’ na labot ahi’ otalima miu ma’ima-ima’.
11 Aya mule’ i Yesus anu singkona sinanggohan i Yustus na singkona mompakatu salam hi komiu. Maka’ uka aha mian nu Yahudi anu mompolinganga’ i Tumpu Yesus, na lahi’ uka aha totolu na susumo uka monsaimpoka-pokalajaa aku montoluk kalajaa anu lengkat hi Anu Nonsihang. Aha na maka’ nontulungi ahi’ mae aku totu-totu’u.
12 Tiba aya i Epafras anu singkona lengkat mae itina’ hi komiu na singkona mompakatu salam hi komiu. Maka’ aitu ia na botuan ahi’ i Kristus Yesus anu saja’ monsusa’akon ka’ momoitaakon komiu, da komiu madodo ka’ tu’a ahi’ totu-totu’u, da obatuki hi’ miu iwi-iwi’ na pongka’oho’ nu Anu Nonsihang.
13 Maka’ posi aku ahi’ na nontoa bau-baunyo nu ia nongkakebuhakon nokalajaa hi komiu tiba to sanga-sangalu anu i Laodikia tiba Hierapolis.
14 Ka’ aya mule’ hai Lukas lokoteen anu okalibosinto tiba i Demas na singkona mompakatu salam hi komiu.
15 Ka’ toka hi’ osisikakon, salam hi aha to utu-utus anu mompolinganga’ i Yesus kijo’ mae i Laodikia, tiba mule’ kijo’ hi Nimfa tiba kijo’ hi aha sangalu anu mompolinganga’ anu lewa’ mobuke’ kijo’ i laigannyo.
16 Ingkop sulat aya na opokobasa’akon itina’ hi komiu na toka hi’ singkona obasa’akon kijo’ i jema’at nu Laodikia. Uka mule’ sulatku anu pinaka tungku hi jema’at nu Laodikia na manau’ nupakatuakono moitina’ hi komiu, na tio hi’ labot obasa’akon i jema’at.
17 Ka’ toka hi’ osisikakon hi Arkhipus, da kalajaa anu pinoki toluk nu Tumpu hi beleyum, na nutoluk ahi’ ka’ nupopupus ahi’ ma’ima-ima’.
18 Posi aku ahi’ i Paulus na nontulis aya potatae, salam ka’ mompakatu hi komiu. Ingkop atu da toka hi komiu na boli hi’ mae okolilimi na aku aya i talungku’an.
Bisa-bisa’ ahi’ da Tumpu na mombalakaati komiu. Sumo atu na anu osisik mami.