2 Timotius

1

I Paulus nombuka’ sisik

1-2 Sulat aya lengkat hiyau’ i Paulus, anu binee’anNyo mae kuasa da mombutongakon i Kristus Yesus, toka hiyoo’ Timotius anakku anu kukalibosi. Maka’ pongka’oho’ ahi’ nu Anu Nonsihang, na aku pinokaunyo da monsisikakon bau-baunyo nu kantumuu’an anu totu-totu’u tiba sidu-sidutu’, anu tinipo’akon nu Anu Nonsihang, maka’ kita nosa’angu’o ka’ i Kristus Yesus.

Bisa-bisa’ ahi’ da Anu Nonsihang uka Tuma tiba Tumpunto i Yesus Kristus na mombalakaati da saja’ ahi’ opia na libosNyo anu la tutuk benee’Nyomo mae, da toka hiyoo’ boli hi’ koanu okasusa’akon.

Bau-baunyo nu i Paulus najama’ ka’ nonsulakon i Timotius da babihing

3 Ingkop uka na aku majama’ ahi’ hi Anu Nonsihang anu kubatuki tongko-tongko’ lengkat i kinyonyoa anu bu’ou, sumo uka anu lewa’ binau nu aha anu nompolee’ aku naipuan ka’ toka hi’ minsan aku tolosukap hi beleyum saja’ ahi’ aku montalimakase hi Anu Nonsihang ka’ saja’ ahi’ aku momoitaakon beleyum sina tiba pihi.

4 Maka’ uka na dai’ ahi’ tonginau’ hiyau’ na uka oko ihumaang tempo’nyo kita noga’at. Ingkop aitu na mokonyo’ aku pe’e beko kinyonyoa ahi’ da mompahakabot beleyum, da manau’ kita mompahakaboto na aku majama’ ahi’ totu-totu’u.

5 Ingkop uka tinolosukap mule’ hiyau’ na atina’ beleyum na anu hi’ tinaha’imano totu-totu’u hi Kristus Yesus, sumo hi’ uka popu’um i Lois tiba tinaum i Eunike. Ingkop atu na kusumbu’ ahi’ malingkoyaa ahi’ beleyum na singkona hi’ mompolinganga’ susumo aha.

6 Ingkop atu na uka kupo’ingat ahi’ hiyoo’ da okakekei ahi’ na monggunakon kuasa anu pinosi bee’ nu Anu Nonsihang hi beleyum tempo’nyo uka aku nompotudu lima i buanum. 7 Maka’ Kinyonyoa nu Tumpu anu binee’Nyo mae hi kita, na misa’ ahi’ ko moko patakut kita. Kinyonyoa nu Tumpu na moko pahoson ahi’ kita, da kita mongkalibosi ahi’ ka’ otatapakon ahi’ na kinyonyoa.

8 Ingkop atu da toka atina’ hiyoo’ na boli hi’ ma’ambang na monsisikakon hi mian bau-baunyo nu uka Tumpunto tiba boli hi’ oka’ambangakon na uka beleyum lewa’ mae nojajalan aya aku anu tinalungku’o kalana nonsisikakon bau-baunyo nu Ia. Ingkop atu da toka hiyoo’ na okakebuhakon ahi’ maka’ Anu Nonsihang ahi’ na mompokohoson beleyum da nupokoala na monsabilakon lusa’ kalana monsisikakon hi mian Lele Ma’ima’ anu lengkat hi Anu Nonsihang.

9 Maka’ kita ilumpatan mae nu Anu Nonsihang ka’ ilaganyo da kita tinimbalimo hi’ mianNyo. Ia nolaga mule’ mae kita na misa’ ahi’ ko posi bauonto, totonggon ahi’ posi pongka’oho’Nyo tiba libosNyo anu la tutuk binee’Nyomo mae hi kita. Ia nongkalibosi mule’ mae kita na ukamo hi’ i Kristus Yesus maka’ atu na salataa pe’e ahi’ ma’isa tinimbali na dunia. 10 Maka’ uka na pinotoanyomo hi’ mae hi kita na aitu libosNyo anu la tutuk binee’Nyomo mae, uka Ia tinoka na i Yesus Kristus toka mae nolumpati kita. Toka mule’ mae pinolumpatinyo kita na ukamo hi’ Lele Ma’ima’, da boli hi’ kita sainjoong silaka, kita montumpuimo ahi’ kantumuu’an lambaakonnyo.

11 Ingkop mokonyo’ aku pinotade mae nu Anu Nonsihang da mombutongakon ahi’ i Yesus Kristus ka’ timbali gulu’ ka’ monsisikakon Lele Ma’ima’. 12 Aya na mokonyo’ aku monta’up lusa’ susumo aya, panyo ka’ toka hiyau’ na madi’ ahi’ ko gagana’ aku ma’ambang maka’ malingkoyaa ahi’ tongko’ uka i kinyonyoangku na anu kutaha’imani, hi Kristus na tio-tio hi’ upokoala na monjagai uka anu pinotoongNyo mae hiyau’ lambaakonnyo hi’ saidi’ mae poule’ Ia toka.

13 Ingkop atu da toka atina’ hiyoo’ na otoongi ahi’ tongko-tongko’ na ajaran anu totu’u uka anu pinotingaanku hiyoo’ ka’ tataap ahi’ taha’iman hi Kristus ka’ maingkali-kalibosian ahi’ maka’ kita sa-sa’angu’o ahi’ ka’ i Kristus Yesus.

14 Ingkop toka atina’ hiyoo’ na aitumo hi’ kuasa nu Kinyonyoa nu Tumpu anu natiusok hi kita na mompokohoson da ojagai ahi’ ma’ima-ima’ na atina’ halataa anu mosi pa’ima’ anu pinotoongNyo hiyoo’.

15 Maka’ uka na beleyum pe’e be nonsumbu’o ahi’ kada’isanannyomo ahi’ na aha kikijo’ i Asia anu mompolinganga’ tiba kijo’ hai Figelus ua hai Hermogenes na ihikunyomo ahi’ mae na aku.

16 Panyo kijo’ hai Onesiforus aha sa’angu’ na laigan na bisa-bisa’ ahi’ da saja’ ahi’ nupia na nonong nu Tumpu. Maka’ madi’ ahi’ ko ia na’ambang na saja’ mae nondumpaki aku aya i talungku’an ka’ toka mae nolumui. 17 Maka’ manau’ ia tinokamo aya i Roma na toka hi’ mae pagala ilionyo na aku lambaakonnyo kinabotnyo. 18 Ka’ beleyum pe’e be monsumbu’ ahi’ lewa’ ahi’ mae ia nontulungi aku kijo’ i kota’ u Efesus. Bisa-bisa’ ahi’ da saja’ ahi’ upia na nonong nu Tumpu lambaakonnyo saidi’ mae kiamat na tano’.

2

Bau-baunyo nu i Paulus nonsisik I Yesus na bau sonto’

1 Ingkop atu da toka atina’ hiyoo’ Timotius anakku na uka hi’ libos u Tumpu anu la tutuk binee’nyomo mae hi kita, uka kita pinosa’angu’o ka’ i Kristus Yesus na saja’ mompokohoson beleyum. 2 Uka mule’ ajaran anu ihongoum hiyau’ uka mae lewa’ pinotingaanku hi mian koda-koda’isan, na lako’ hi’ opotoong hi mian anu otoa timbali montoluk ka’ pande na mompotingaan mian.

3 Maka’ susumo atu mombatuki i Kristus Yesus na sumo hi’ balu-balu’ nu tantada mopalaang. Ingkop atu da toka atina’ hiyoo’ na susumo atu monta’up lusa’ na opokohoson ahi’ na kinyonyoaum susumo tantada anu ma’ima’.

4 Maka’ susumo atu tantada anu lako-lakonyo montoluk tugasnyo na madi’ ahi’ ko lewa’ ia hiaon i posi kalajaanyo sansina-sina, lahi’ sa-sa’angu’ kijo’ palenta nu kamundaannyo na nubau da monsongka’ ahi’ kijo’ pongka’oho’nyo.

5 Oboamo susumo atu i mian anu maintangka’ maka’ lahi’ de ia mombatuki kijo’ atulannyo jo ia menaang.

6 Susumo mule’ atu anu topokaeng, anu mongkakebuhakon mokalajaa pinaasnyo, atu ahi’ na momonanyo montalima hasing nu kalajaanyo.

7 Ingkop atu da toka atina’ hiyoo’ na saja’ ahi’ oinau’ na uka anu sinisikku, maka’ Tumpu ahi’ na monsampuusi da toka hi beleyum na nusumbu’ ahi’ iwi-iwi’ na kakonaannyo nu uka anu sinisikku.

8 Uka mule’ bau-baunyo nu i Kristus Yesus na toka hiyoo’ na boli hi’ okolilimi, maka’ aitu Lele Ma’ima’ anu lewa’ sinisikakonku, na ukamo hi’ lee’ i Daud anu hi’ sinilaka panyo poule’ hi’ tinumuu’.

9 Aitu hi’ monsisikakon Lele Ma’ima’ na mokonyo’ aku lusa’ ka’ pinaka pungu mule’ nu lante’ susumo mian ma’idek. Panyo naumo na sumo atu be sisik u Anu Nonsihang na madi’ ahi’ ko opoko pungu.

10 Aitu ahi’ na mokonyo’ kupokoala na montatapakon susumo atu anu tina’upku iwi-iwi’. Maka’ monginau’ aha to sanga-sangalu anu pinile’ano nu Anu Nonsihang, da aha mohumpak ahi’ kasalamatan lengkat uka hi Kristus Yesus ka’ monta’upo ahi’ kantumuu’an anu madi’ koanu moliu-liu lambaakonnyo.

11 Ingkop aya anu kusisik na anu hi’ totu’u,

“Maka’ de kita singkonamo hi’ sinilaka gampanyo Ia,

na maka’ loloi’nyo poule’ ahi’ kita tumuu’ gampanyo Ia.

12 Maka’ de tataap ahi’ saja’ kita mintoong madodo-dodo hi Ia naumo lusa’,

na saidi’ mae kita singkona ahi’ mompalenta gampanyo Ia.

Panyo de kita mompotundei Ia,

na maka’ naumo pe’e Ia be mompotundei ahi’ mae kita misa’ ahi’ ko mianNyo.

13 Lahi’ maka’ naumo pe’e kita madi’ ahi’ ko saja’ mosa’angu’ na mombatuki Ia,

be hi Ia na nubuntui ahi’ iwi-iwi’ na anu tinipo’akonNyo hi kita, maka’ sumo hi’ atu na sipatNyo, hi Ia na anu nupoko sisikko na madi’ ahi’ ko pongabali’nyo.”

Bau-baunyo nu mokalajaa monsongka’ Anu Nonsihang

14 Ingkop atu da toka atina’ hiyoo’ na saja’ ahi’ lako’ opotuka’ hi aha to sanga-sangalunto na aitu iwi-iwi’. Maka’ Anu hi’ Nonsihang na monsakisii mae, da toka atina’ hi beleyum na lako’ ahi’ opokinde’i na aha anu lewa’ maimbahan i anu madi’ ko kaliangannyo. Maka’ lewa’ maimbahan susumo atu na madi’ ahi’ ko gagana’ koanu ohumpak na ima’nyo. Lahi’ da mompotalas ka’ monsaduakon da kasau na mian anu moho-mohongo.

15 Ingkop toka atina’ hiyoo’ na osisikakon ahi’ ma’ima-ima’ na aitu ajaran anu totu-totu’u anu lengkat hi Anu Nonsihang, da boli hi’ montutugi sala’ambangan hi Anu Nonsihang, maka’ mompaha sintoka ahi’ totu-totu’u Anu Nonsihang na atina’ anu nukalajaa.

16 Ingkop atu na opokojo’on ahi’ na susumo atu lewa’ mombisalaakon anu madi’ ko kaliangannyo anu moko pajo’on Anu Nonsihang. Maka’ lewa’ mombisalaakon anu susumo atu na lahi’ monsaduakon mian da mompaka ko ide-ideknyo. 17 Maka’ anu mompotingaan susumo atu na sumo hi’ balu-balu’ nu panyakit kanker molele ahi’ hi mian saga’at.

Maka’ saga’at na kijo’ ahi’ hai Himeneus ua hai Filetus na mombau susumo atu. 18 Aha na nolempango ahi’ i ajaran anu totu-totu’u ka’ mompokasau kijo’ aha saga’at na mian anu mompolinganga’. Maka’ lewa’ ahi’ nusisik, Anu Nonsihang mombulaakon mian anu sisinilakamo na polo’o ahi’.

19 Panyo oboamo susumo i laigan, Anu hi’ Nonsihang na nombau pundasi anu madodo madi’ ahi’ ko polenggon. Maka’ tinulisano ahi’ ata’ i buannyo,

“Hi Tumpu na nupaha sumbu’ ahi’ mae na batu-batu mianNyo,”

tiba mule’ mian anu monsisik konyo,

“Ia na Tumpu ahi’ na montumpui na toka hi mian kikijo’ tio hi’ otibahakon na mombau anu ma’ide-idek.”

20 Ingkop susumo i laigan anu talenga’nyo manyonjoo’ ahi’ na ngahanan nu pakakas anu kijo’ i unonyo, koanu hi’ binau lengkat i mas tiba pelak, koanu hi’ binau lengkat i kau’ tiba tano’. Pakakas anu binau lengkat i mas tiba pelak na maka’ opake ahi’ tempo’nyo kapalaluan anu ma’ima’ tiba mingkaliangan, pakakas anu binau lengkat i kau’ tiba tano’ na opake ahi’ i kapalaluan anu biasa.

21 Sumo atumo na komiu, de toka hi komiu otibahakon ahi’ na anu ma’idek ka’ lahi’ anu ma’ima’ na obau, na mian atitina’ na timbali hi’ opake i kapalaluan anu ma’ima’ tiba mingkaliangan. Ia nuposi potade ahi’ nu kijo’ tumpunyo da mingkaliangan ahi’ toka hi ia. Ia opoguhat ahi’ saja’ opake toka i kalajaa anu ma’ima’.

22 Ingkop atu da toka atina’ hi komiu na opokojo’on ahi’ na bauon kasanaangan nu mian anu dai’ muda. Okakebuhakon ahi’ da kantumuu’an na pokakana ahi’ pongka’oho’ nu Anu Nonsihang, ka’ saja’ ahi’ mombatuki ajaran nu Tumpu ka’ maingkali-kalibosian ka’ boli hi’ lewa’ mompahasala’ samian. Mosa’angu’ ahi’ hi aha anu lewa’ mokitulung hi Tumpu, anu hi’ molonde’ na kinyonyoa.

23 Ka’ boli hi’ lako’ lewa’ matituang hi sangalu maimbahan anu singkaap potun madi’ koanu nu sumbu-sumbu’. Maka’ beleyum pe’e be monsumbu’o ahi’ anu obau susumo atu na lahi’ monsaduakon da mahansega. 24 Maka’ madi’ ahi’ ko kona na de anu mokalajaa hi Tumpu ka’ lewa’ mahansega, tio hi’ ia lame’ hi mian iwi-iwi’ ka’ nupokoala ahi’ na mompotingaan mian ma’ima-ima’ ka’ tatap.

25 Ka’ otatapakon ahi’ na mompotingaan mian anu lewa’ mombahaakon, ka’ jumo hi’ nubee’i ahi’ nu Tumpu tempo’ na mian anu susumo atu da aha mombali’i ahi’ ka’ montalima ajaran anu totu’u. 26 Ka’ aha poule’ ahi’ sainsumbu’ da aha molapas ahi’ i apaa i Lusupen anu nompungu aha ka’ momboa aha da mombatuki pongka’oho’nyo.

3

Bau-baunyo nu saidi’ mae sina imihi

1 Ingkop atu da toka hiyoo’ na oinau’ ahi’, maka’ saidi’ mae sina imihi na manjoo’o ahi’ na sansala anu ota’up. 2 Maka’ tempo’nyo atu na mian mehi’ montutugi posi butong, ka’ daka’ i doi ka’ lewa’ montua-tuangi sisik ka’ mompopotangkas butong ka’ mongejek samian, tu’anyo madi’o ahi’ ouati, tiba monsumbu’ montalimakase madi’ ahi’ tiba moholomati Anu Nonsihang madi’o ahi’. 3 Tiba mongkalibosi samian madi’o ahi’, madi’ ahi’ mongampuni samian, lahi’ mongkaima’i lewa’ mompobau-bau samian, madi’ utatapakon na kinyonyoa, kasan hi samian, anu osanannyo ma’ima’ ahi’ maka’ ukaideki ahi’. 4 Lahi’ mongkaima’i mongakali samian tiba madi’ ahi’ ko montutugi dodop hipuan ka’ saja’ mongakut butong na tahuu i kita’, ka’ Anu Nonsihang na nuhiku ka’ aha mongkasasaha’i mombatuki kasanaangan nu dunia.

5 Maka’ atu naumo pe’e montoa na aha makeke ahi’ na lewa’ mobuke’ monsangke Tumpu, panyo ka’ mompotundei ahi’ kuasa nu Anu Nonsihang na mongabali’ kantumuu’an nu aha. Ingkop atu na opokojo’on ahi’ na mian anu mombau susumo atu.

6 Maka’ kijo’ aha na koanu hi’ lewa’ soo’ kuaa i to lai-laigan aha hi’ pa’ sangkuka, atu mule’ na lahi’ tutuk aha minsoopo hokot ka’ soo’ lewa’ mompiulu’i to bo-boune anu ma’isa tu’a i Sisik u Tumpu anu manjoo’ na dosa’ ka’ apaa na anu nukahanda’i nupaha potuhumo ahi’. 7 Maka’ toka hi aha to bo-boune saja’o hi’ aha momoita da opotingaan, panyo madi’ ahi’ ko mongkaho’ aha monsumbu’ ajaran anu totu-totu’u lengkat hi Anu Nonsihang.

8 Susumo naipuan mae hai Yanes ua hai Yambres nolawan i Musa, sumo hi’ atumo na aha anu mombau susumo atu, maka’ ulawan ahi’ nu aha na ajaran anu totu-totu’u anu lengkat hi Anu Nonsihang. Kinyonyoa nu aha montutugi na na’ideko ahi’, aha mule’ taha’iman na susumo i sulu’ nopoho’o ahi’. 9 Lahi’ maka’ malingkoyaa ahi’ kijo’ anu nubau nu aha na madi’ ahi’ ko dai’ ia mintuus, maka’ sumo hi’ uka hai Yanes ua hai Yambres, tio-tio hi’ sainsumbu’ hi mian na madi’ ahi’ koanu nupisumbu-sumbu’ nu aha.

Bau-baunyo nu to poki-pokinde’ i Paulus

10 Panyo atina’ beleyum, na anu hi’ nombatuki ajaranku tiba kakonaannyo nu kantumuu’anku ka’ nontiho hi’ mae aku. Tinoaumo hi’ mae na bau-baunyo nu aku taha’iman tiba sabaan tiba mongkalibosi samian ka’ pinoko alangku ahi’ na nontahanakon tempo’nyo aku nonta’up lusa’.

11 Maka’ uka na tinoaumo ahi’ na uka lewa’ aku ingilonan nu mian ka’ lewa’ aku ilusa’, nalingkoyaamo ahi’ hiyoo’ na uka anu tina’upku uka tempo’nyo kijo’ i Antiokhia tiba Ikonium tiba Listra, nalingkoyaamo ahi’ hiyoo’ iwi-iwi’ na lusa’ uka anu tina’upku, panyo tataap ahi’ aku ilumpatan mae nu Tumpu da aku kinopi-kopian ahi’.

12 Maka’ iwi-iwi’ na mian anu mongkahanda’i ia tumuu’ matakut ahi’ hi Anu Nonsihang ka’ mosa’angu’ hi Kristus Yesus, na tio-tio hi’ u iloni nu mian. 13 Panyo de mian anu ma’idek tiba mian anu mompotalas na lahi’ mompaka ko ide-ideknyo. Maka’ lako’o hi’ aha mompotalas mian, jo posi aha pe’e maka’ singkona hi’ labot nupotalas nu mian utu mae.

14 Panyo toka atina’ hiyoo’ Timotius na tataap ahi’ saja’ mintoong ma’ima-ima’ i ajaran anu totu’u uka anu pinotingaanku hiyoo’ tiba uka anu pinolinga-nga’um totu-totu’u, maka’ nalingkoyaamo ahi’ hi beleyum na pa’ iyee na to gulu-gulu’um. 15 Maka’ toka atina’ hiyoo’ na saja’ ahi’ oinau’ na uka pe’e mae beleyum dai’ hiko’ sinumbu’umo ahi’ na Sisik u Tumpu. Maka’ i Sisik u Tumpu ahi’ na pinonsumbu’anum, da timbali oko tinaha’iman hi Yesus Kristus ka’ nohumpak kasalamatan.

16 Maka’ iwi-iwi’ na anu tinulis i Sisik u Tumpu na sinawohan ahi’ nu Anu Nonsihang, da mingkaliangan ahi’ ka’ mompotingaan anu totu’u ka’ mompisala’i ka’ momposisik anu sala’ ka’ mompotingaan mian da kantumuu’an pokakana ahi’ pongka’oho’ u Anu Nonsihang. 17 Ingkop aya hi’ Sisik u Tumpu na binee’ mae nu Anu Nonsihang da momposampa’ mian da opokoala ahi’ na montoluk kalajaa nu Tumpu ma’ima-ima’.

4

Bau-baunyo nu i Paulus nonsulakon i Timotius da tataap ahi’ babihing

1 I Kristus Yesus na poule’ ahi’ mae minsusule’ toka aya i dunia ka’ toka mae montimbang kita mian anu dai’ tutuu’ tiba anu sinilakamo ka’ toka mae mompalenta susumo Tomundo’. Ingkop Anu hi’ Nonsihang tiba Kristus Yesus na montoa mae aya aku pagala momoita hiyoo’, 2 da toka atina’ hiyoo’ na saja’ ahi’ lako’ osisikakon na Sisik u Tumpu, hi sangalu mau aha ma’ima’ na mohongo tiba na imadi’. Maka’ de sala’ na anu nubau nu aha na maka’ lako’ ahi’ opotuka’ hi aha ka’ opisala’i . Panyo mompisala’i mule’ atu na otatapakon ahi’ na kinyonyoa. Tiba mule’ montoluk aitu, na iwi-iwi’ opu’ui ahi’ nu ajaran lengkat hi Tumpu.

3 Saja’ hi’ obau sumo atu maka’ manau’ tokamo i tempo’nyo nu mian madi’o aha montalima ajaran anu ma’ima’, na madi’o ahi’ aha mohongo anu opotingaan. Maka’ aha mompotuhumo ahi’ kijo’ posi pongka’oho’nyo, mokonyo’ lako’ mae aha mongkongkonakon to gulu-gulu’ anu toka mae mompotingaan anu monsongka’ bihing nu aha. 4 Maka’ nutotonggolakon ahi’ madi’o ahi’ nupotombihing nu aha na ajaran anu totu’u ka’ lako’ mongkasasaha’i mongkaima’i mohongo undu-unduon.

5 Panyo toka atina’ hiyoo’ na saja’ ahi’ osohop. Boli hi’ matakut na beleyum montutugi monta’up lusa’ kalana montoluk kalajaa i Tumpu Yesus. Otoluk ahi’ na kalajaaum monsisikakon Lele Ma’ima’ ka’ opoingkot ahi’ iwi-iwi’ na atina’ kalajaaum hi Tumpu.

6 Aya mule’ butongku, uka na tempo’nyomo ahi’ nu aku silaka bau susumo hana’u hi Anu Nonsihang. Ingkop kolia-lia’nyomo ahi’ na aku mompala’i aya dunia.

7 Ingkop aku montoluk kalajaa nu Tumpu anu pinokitolukNyo mae hiyau’, na oboamo susumo i anu maintangka’ hiyau’ na kinakebuhakonku ahi’ ma’ima-ima’ ka’ tinolukku ahi’ pupu-pupus, saja’ ahi’ aku nintulu hi Kristus. 8 Ingkop uka na tokamo hi’ aku montokai hadia nu anu menaang anu pinoguhatakonNyo hiyau’, maka’ anu binaungku na anu hi’ pokakana pongka’oho’ u Tumpu anu montimbang kita mian, Ia montimbang mule’ atu na lahi’ anu sahondo-hondonyo. Maka’ Ia na anu hi’ adin. Maka’ saidi’ mae imihi tokamo i tempo’nyo nu Ia montimbang kita mian iwi-iwi’ na aku mohumpak ahi’ hadia anu nubee’ mae hiyau’. Panyo misa’ ahi’ ko la aku na mohumpak, tiba hi’ batu-batu mian anu mompopea’i Ia poule’ mae toka.

Puusnyo nu anu pinoto’i i Paulus hi Timotius

9 Ingkop toka atina’ hiyoo’ na sampa hi’ mambaa mae mo’uka hiyau’ uka lia-lia’, 10 maka’ aya aku pinala’iano ahi’ i Demas ka’ ia nambaa i Tesalonika ia dinaka’o ahi’ aya i bauon nu dunia. Uka mule’ i Kreskes maka’ nambaamo ahi’ i Galatia, i Titus maka’ nambaamo ahi’ i Dalmatia. 11-12 Uka mule’ i Tikhikus na pinokaungkumo ahi’ da mambaa i Efesus. Mehi’ i Lukas na dai’ aya monsainjojo-jojoong aku. Ingkop mehi’ singkaboti na i Markus ka’ poboa mae mo’uka, maka’ ia na toka hi’ mae montulungi kalajaa anu kubau.

13 Ingkop de oko mambaamo mae mo’uka na boakon ahi’ mae na itina’ juba anu inguna’ku itina’ i laigan i Karpus itina’ mae i Troas tiba itina’ to bubuukku, panyo suba-subanyo na itina’ buuk anu binau lengkat i kilit nu binatang.

14 Maka’ kijo’ i Aleksander anu topobau pakakas lengkat i besak tiba tambaga’ na manjoo’ ahi’ na anu ma’idek lewa’ mae binaunyo hiyau’. Panyo atu na posi Tumpu ahi’ na mombalosi kijo’ anu binaunyo. 15 Ingkop toka atina’ hiyoo’ na osohop ahi’ na kijo’ ia, maka’ babihing ahi’ tongko’ na ia mombahaakon ajaranto.

16 Maka’ uka salataa aku sinidang aku nontutuhakon kahondoanku, na buu’ ahi’ nalai na mian, sahanyo pe’e samian na anu nonsangalui mae aku nontinjohakon madi’ ahi’, bisa-bisa’ ahi’ da aitu anu binau nu aha na nu ampunimo ahi’ nu Anu Nonsihang.

17 Panyo Anu hi’ Nonsihang na nonsangalui mae aku ka’ nompokobaani mae da pinoko alangku na monsisikakon Lele Ma’ima’ iwi-iwi’, da iwi-iwi’ na aha anu misa’ pe’e mian nu Yahudi buu’ ahi’ nohongo ka’ aku kinopi-kopian ahi’ madi’ ahi’ ko sinilaka.

18 Maka’ atu na posi Tumpu ahi’ na nolumpati mae aku naumo pa’ apaa na anu nubau mae nu mian hiyau’ da aku ma’idek. Aku nuboa ahi’ kopi-kopian mokita’ i sulugaa’ anu kajojoonganNyo mompalenta. Ingkop atu da lahi’ Ia na ounde’ ka’ opopotangkas lambaakonnyo. Amin!

Salam lengkat hi Paulus

19 Salam hi hai Priskila ua hai Akwila tiba hai Onesiforus aha sampotoutus.

20 Maka’ i Erastus na dai’ ahi’ jinojoong kijo’ i Korintus, uka mule’ i Trofimus na mapalak ahi’ na uka aku nompala’ii mae kijo’ i Miletus.

21 Ingkop uka na molio pe’e hi’ mae tempo’ ka’ paga-pagala pe’e hi’ mae mambaa uka i aluk nu tempo’ uloop.

Salam lengkat hi hai Ebulus ka’ i Pudes ka’ i Linus ka’ i Klaudia tiba batu-batu to utu-utus.

22 Bisa-bisa’ ahi’ Tumpu na nonsangalui beleyum. Bisa-bisa’ ahi’ Tumpu na mombalakaati komiu to utu-utus!